Gilla in Chomded Ua Cormaic

 p.125

Aimirgin Glúngel tuir tend

1. Aimirgein Glúngel tuir tend,
   cét-ugdar amra Éirend,
   ba breithem, ba coimgnid cain,
   ba file, ba fír-senchaid.
2. I n-aimsir meic Leite lóir
   Fergusa ruibnig ríg-móir
   in darna fer gláime glé
   Sen mac Áige é-side.
3. Bríg Ambáe ben Blaí Briugad
   in tres saí, bid sír-chuman;
   in cethramad saí srethach
   Connla Connacht caín-brethach.
4. Is é in Connla cétna cóir
   co n-nirt Spirit Naím nert-móir
   ro-lá conflicht ro-s-conaig
   risna druídib díthoraid.
5. At-bertatar na drúide
   athesc n-étig n-imthnúide,
   conid íat ro gní nime
   is talam co tromthige.
6. At-bert Connla co céill n-glicc:
   dénaid dúind is creitfimit
   coro taitne in grían atúaid
   dar lind lera lethan-rúaid.
 p.126
7. Ór ná cumgaid, ar Connla,
   for gním n-ard co n-imdolma,
   is ferr dúind táeb risin fer
   do-rigne im cach náem núa-nem.
8. Cid ima n-geibthe in bur leith
   gníma Meic Dé? Ní deig-breith,
   ní re fertaib ro fallta,
   ór ná techtaid cumachta.
9. Ba h-é in cúiced sáer-chaín súad
   Sencha mac Cáelchlaín ón chúan;
   ba hé in sessed garta glain
   a mac Fachtna féthamail.
10. Sencha mac Oilella ard,
    ba hé in sechtmad saí sáer-garg;
    in t-ochtmad, comall caín cas,
    mac Maín, Morand mór-amnas.
11. In nómad, ní fíam follaig,
    Neire mac fíal Findchollaig;
    in dechmad ba nertmar nath
    in Find Fechtnach Feradach.
12. In t-áenmad fer déc ba-déin
    ba h-é Fíthal co fír-chéill
    tarraid ré Láegaire ar leirg
    ó ré Chormaic cloidim-deirg.
13. Sencha mac Cáelchlaín cen chol
    athair Fachtna, in fer fír-dron;
    Fachtna, fer co líthaib Dé,
    athair Fíthail, finnid-se.
 p.127
14. Cét-ugdair Éirend uile,
    fesa Fótla folt-buide—
    tucsat críchad ar gaís n-gil
    ó Fíthal co h-Aimirgein.
    Aimirgein.
15. Ro deilig Día dígrais dron
    do cach fir díb-sin sainmod
    co m-bered breith taitnim tricc
    rachta aicnid amnas-glicc.
16. Aimirgein Glúngel ba gáeth
    ní bered bretha co báeth;
    fesa Féine leis tar ler
    roscada féige filed.
17. Mac Áige dá m-bered bréic
    ástais bolga arin m-bláith-géic,
    dá ráided fír rib arís
    bolga-sin no sergatis.
18. Ro thidnaic Día, deilm cen gáe,
    gaís aicnid do Bríg Ambáe
    coná bered, ba mín mod,
    acht breith fír ro fosugad.
19. Connla caín-brethach ba caín,
    lán do rath in Spirit Naím
    coná ruc bréic ó ro baí
    ná ainbreth ná imargaí.
20. Sencha mac Cáelchlaín calma,
    ba h-í a aiste adamra
    ná bered breith, foirbthe fair,
    cen oidche re h-urscrútain.
 p.128
21. Acus a mac Fachtna find,
    dá m-bered bréic, bad derb lim,
    tuited mes cach muine mín
    uile uile in n-aidche-sin.
22. Mad i n-aimsir blechta báin
    no h-indised í i n-irdáil
    no séntais baí láega lis
    riu táeba ní tobraitis.
23. Nó dá n-impód fri breith ̇fír
    ba h-óg arís in mes mín
    scardais fri sáetha laíg lis,
    baí báetha ro bligitis.
24. Sencha mac Oilella úaig
    trí ailche leis ri breith m-búain.
    Ní bered breith saír suba
    cen trí ailche astuda.
25. Fíthal mac Fachtna ba flaith;
    fír n-aicnid leis ba lán-maith,
    coná bered breith m-berta
    résin n-intlecht n-aicenta.
26. Cid Morand, do chreit do Día,
    ba breithem rán, ba ríg-nía;
    móite ro ̇fúaig 'ma rig rath
    ó fúair in n-id n-ilbúadach.
27. Ugdair na gaíse glaine
    cen béim baíse báeglaige,
    tucsat mór do díamair dam;
    cen dán íarraith ní annam.
    Aimirgein.
 p.129
28. Finntar fégtar na filid,
    daíne deiligthe in dligid;
    do-fégthar cumma cumtaig
    don Gaídilc at glan-ugdair.
29. Ba file díb Fergus fíal.
    Fergus Fíannaind, gleórda in grían,
    i n-inis Fíannaind, ferr de,
    rop é in chíall-̇find Cíarraige.
30. Feircheirtne file, deilm n-dil,
    úa-side Dedad meic Ssin;
    Néide fúair comamra aíb
    ard-mac Adna meic Uithir.
31. Athairne amnas ba h-áith.
    Ro lín a chlú clúasa cáich;
    ocus a mac Fergna fíal,
    ropo dalta co n-daig-míad.
32. Cét-chuit chumtaig ar gaís n-glic
    cech ugdair díb-sin sloindmit
    fond <title TEIform="title">Senchais Móir</title>, lorg lethach,
    fúair mac Áige il-brethach.
33. Imthórmach <title TEIform="title">Senchasa</title> sain
    ri Dubthach mac úa Lugair
    ocus fri Fergus filid;
    ra-n-dedlus ra dáer-finib.
34. <title TEIform="title">Imart n-Áirechta</title> cen acht
    ugdaras Connla Connacht;
    cuit Fíthil fúair deg-dath n-dron
    <title TEIform="title">Aí Emnach</title> cen imreson.
 p.130
35. <title TEIform="title">Tailbretha Fachtna</title>, is cert caín,
    meic Sencha meic Cáelchlaín;
    athair dó in Sencha senna,
    ní Sencha mac Oilella.
36. Airig Moraind delbaim dóib:
    <title TEIform="title">Cóir Féine Bic ocus Móir</title>,
    <title TEIform="title">Midba Breth</title> ocus <title TEIform="title">Caire Breth</title>;
    Morand ros-lá ima sech.
37. Formna <title TEIform="title">Senchasa Móir</title>
    nónbar ro chumtaig co cóir;
    <title TEIform="title">Náėfis</title>, canóin cáemda cain
    re fesaib náemda in nónbair.
38. Pátraic, Beinén, Cairnech cain,
    Láegaire mac Néill nertmair,
    Fergus file, gáire glan,
    ocus Dáire rí Ulad.
39. Ocus rí Muman cen meirg
    Corc mac Luigdech co láim deirg;
    Dubthach úa Lugair don lind,
    saí in Bérla Rus mac Trichim.
40. Náe suíde sin nír sáeb snas,
    ríaglaigset co sáer senchas
    íarna thúr dóib tre gaís n-gil
    as cach aís ó Aimirgein.
    Aimirgein.
41. Tríar nár geibed Banba bras
    i n-airde is i n-airechas
    mar ̇fácbait 'ca reic man-roind
    ria Cáin Pátraic meic Calproind:
 p.131
42. In cét-̇fer, fer coimgne cain
    re scélaigecht do Scotaib;
    fer cerda, ní monar mall,
    áer is molad na mór-rann.
43. Breithem re breithemnas m-bil
    a fesaib a fásaigib
    rigit roscada filed,
    má do-fégthar fír-dliged.
44. Ó tháinic Pátraic, mod mas,
    tucsat don ̇fir airechas,
    d' ̇fir in Bérlai Báin, ferr de,
    do chind cháid na canóine.
45. Ó ruc Aimirgein gáeth grind
    cét-breith ar tús i n-Éirind,
    ba la fileda ná-ma
    bretha sáerda senchasa.
46. Cosin n-imacallaim áin
    Feircheirtne is Néide nem-náir,
    ní damthea do neoch dliged
    acht a brethaib bard-filed.
47. Cach flaith cundail ro-chúala
    dub-labra na Dá Thúara.
    Rucsat, ar síat, ar sligid
    úaind in fecht-sa fis filid.
48. As-bert Concobar cen chol:
    léicid as bar n-imreson;
    cách in fecht-sa arin bith bras
    úaib co bráth fon m-breithemnas.
 p.132
49. Geibed cách a dréchta de
    —is ed téchta in túaslaicthe.
    Ná berat foscad filid
    acht a roscad rodligid'.
50. Ó sin 'le ní rucsat breith
    filid a l-labrad ar leith,
    acht a cuit and amar cách
    in tan ná fégtha in fír-̇fáth.
51. Amail ro gabsat, búan blad,
    <title TEIform="title">Bretha Fachtna meic Senchad</title>,
    <title TEIform="title">Bretha Moraind</title>, mitte fíach,
    is <title TEIform="title">Gúbretha Caratníad</title>.
52. <title TEIform="title">Bretha Echach meic Luchta</title>,
    <title TEIform="title">Bretha Bríge</title> réill-rachta,
    <title TEIform="title">Breth Doet Neimtheine</title> íar n-alt,
    <title TEIform="title">Bretha Eógain meic Durrthacht</title>.
53. <title TEIform="title">Bretha Dían Cécht</title> ó leigib.
    Cuit cáich i m-<title TEIform="title">Brethaib Neimid</title>
    acht ba fer cerda, guth glan
    Indse Elga ard-ollam.
54. Persanda na m-<title TEIform="title">Breth Nemed</title>
    ótá tosach co dered:
    Athairne, ba comall n-glan,
    Dagda, Morand, Morrígan.
55. Neire mac Findchollaig fíal,
    mac Adna Néide, ba níam,
    Senbec sídech saí senma,
    Cend Fáelad mac Oilella.
 p.133
56. Derg Scaleda, mind meda,
    ocus in Find Scaleda;
    ba días báige i n-gaís cen gus,
    dá mac dáime Ír mór-gus.
57. Senchán Toirpéist ba rind ráid.
    Báethgalach húa Búirecháin,
    Forannán, Máel Tuile tair
    bráithre buile Báethgalaig.
58. Cináeth úa Con Mind cen chol
    is é ro theip in tre-̇focol
    ri srethaib co gríanna glan
    a <title TEIform="title">Brethaib níamda Nemed</title>.
59. <title TEIform="title">Auraicept na n-Éices</title> n-ard
    ro chum Feircheirtne fíam-garg
    i n-Emain Macha co m-blaid
    i r-ré in fír-chaím Conchobair.
60. Ro-n-athnaig, ba rith renna,
    Cend Fáelad mac Oilella;
    i n-Daire Luráin ro-lá
    i r-ré Domnaill meic Áeda.
61. Fénius Farsaid, céim co cloth,
    h-é ro ben in m-bobeloth
    cen lúad ar laic-litir lé,
    aipgitir na Gaídilce.
62. Ogma mac in Dagda duinn
    ro ben beitheluis n-ogaim.
    Do-rala na secht m-beithe
    do Lugaid na láech-breithe.
 p.134
63. Úa Cormaic trén ó Thulaig
    ar túr eólais imchubaid,
    ríaglas runna íar lurg lir
    do cach urd íar n-Aimirgein.
    Aimirgein Glúngel.

@article{G100033,
  editor 	 = {Peter Smith},
  title 	 = {Aimirgin Glúngel tuir tend: a Middle-Irish poem on the authors and laws of Ireland},
  journal 	 = {Peritia},
  editor 	 = {Donnchadh Ó~Corráin},
  volume 	 = {8},
  date 	 = {1994},
  pages 	 = {120–150}
}
 G100033.bib