Flann mac Máel Máedóc

Edited by Kuno Meyer

Do chomramaib Laigen inso sis

 p.117
Do chomramaib Laigen inso sis. (Aus Rawlinson B 502, S. 88a).
Fland mac Mælmædōc .cc.
Ēol dam i n-dairib drēchta
in Midaig mūaid mōrēchta,
ēchtaigtis glonnaib gaile
do læchraid lūaith Lorcmaige.
Læchrad Lagen, lūad nad chres,
nīrbo chiūin a comathches,
fri h-Ultu, fri Mumain mūaid
is fri Leth Cuind claidebrūaid.
Is mō āirim, airdi bāig,
an ro-marbsat Laigin láin,
an ro-beotar buidnib drenn
do ōcaib amraib h-Ērenn.
Orddaigem cēin as ada
a catha his a comrama,
tuirmem chena, crōda in clū,
a n-elgnos, a n-ardēchtu.
Ro-ort Labraid Loi̇ngsech Mōen
Cobthach diarbu chomainm Cōel,
co trichait rīg rēil, rob rath,
i m-bruidin Tūamma Tenbath.
Robī Nūadu, noithech scēl,
mac hūi h-Iëir Etarscēl,
ba do Mumain a mada
dia mairt ōs Leirg Labrada.
Læchdu ōcaib co n-āine
Cet mac Māgach meic Dāire,
fo-cheird glonnaib, gairgiu guin,
ailich hi cenn Conchobuir.
His ī-seo ind ail almaib cūan
ro-fitir h-Eireo adrūad,
inchind Meis Gegra gnāthaig
foṙfācbad for ilāthaib.
Ailill mac Māta mōinig,
is aurdaire isna lāidib,
ardrī Āi, ba hān in gein,
is ē robī Amargein.
Hit hē cauraid clōite ferg
ro-beotar Lugaid rēo ̇nderg,
na trī Rūadchind, rēim ̇ngaile,
hit ē beotais Conaire.
Conaire coimsid h-Elgga
ort i m-bruidin Dā Dergga,
at ē rom-beotar ar daig,
na trī Rūadchind do Laigneib.
Ba gairgge gnīmaib gossa
h-ēcht meic Cairpri meic Rossa,
scothais a chenn clēithi de
do Choin Caulaind Murthemne.
Marbais Ailill a dalta,
ba scēl n-i̇ngair n-indatta,
ailis Ailill, ēcht ba dōich,
a sleig hi Fergus mac Rōich.
Ro-gāir brīg bressa buille
an ro-lamair Liguirne,
guin Airtt Ōeṅfir, ardd bine,
hi cath magrūaid Muccrime.
La Mess Gegra, gāir cach thuir,
trēn gnīm ōs allaind Ētuir,
guin Meis Deäd, dīth co feirg,
īar tabairt ūad a gīallcheird.
Ro-fessa a scēla cen brēic
tria chomram na fīan for Fēic,
ro-fig Fothaid, nī deolaid,
ann for Ailill mac n-Eogain.
 p.118
Ēol dam aided, aidble drui̇ng,
Dāire meic Cormaic h-ūi Chuind,
rombī Fothaid laindrech lūain
Mogsaile ō Beluch Gabrūain.
Glanna glan gas co n-gail grinn
Cāilte coslūath gilla Find,
hi cath Ollorba cen meth
ron-geguin Fothaid Airgtech.
Āed mac Fidaig, ferg fēne,
ro-char ingin Breg Ēle,
fo-cher d'urchur lāma Find
do sleig Fīacclaig meic Conchind.
Iath mac Cāilte crodaib crād,
ro-geguin Fīachraich Cassān
h-isin chath clūite flaithe
tūaid hic Temraig co n-daithe.
Dā Rūad Rōirenn, rēim ̇n-gaile,
beotar Fīachaich Sraptine,
Sārnia mac Cirb cētaib ̇n-gīall
ro-gegain Eochaid Dumplīan.
Lām Echdach meic Ēnnai āin
robī Bēcc mac Lethderggāin
hir-Rāith Bēicce cen timmi,
trī chōcait eecess immi.
Iss ē tria gaile gretha
beb Laidcenn mac ̇m-Bairceda,
ba de sain sōiset fo thūaid
ō Inis Coirthi clethrūaid.
Clothrī Insi finni Fāil
Nīall mac Echdach Mugmedāin,
fo-cheird Saxan sreith
ō Eochaid mac Ceinselaich.
In cath i n-īath Dara dēin
ar-gab Lægaire mac Nēill,
nassa fīr na n-dūla de,
ba de ar-bath Lægaire.
Briōn Badgna bertaid graig
mac Echdach meic Muiredaig,
læch do Laignib ro chūala
rombī hi cath Damchlūana.
Crimmthann mac Ēnna co nhīr
geguin Ailill Molt in rīg,
hi cath Ocha, ard a chlū,
is comram for Connachtu.
Ailill mac Dūnlaing, deilm læch,
robī Ōengus mac Nadfrāech,
diargæt Mumu mīlib srath
isin chath i c-Cell Osnad.
Lochēne lonn letrad chath
imbert choilgg for Cummascach,
his Rōn Cerr īar cūrad chrech
robī Āed mac n-Ainmerech.
Dūnchad mac Murchada mūaid,
Āed mac Colgan chlaidebrūaid,
marbsat Fergal, finn a gnē,
hi cath adrūad Almaine.
Fiäch Ailbe airm i ̇ngart
geguin Cór mac Cinnabrat,
i cath læchda Liäch uill
diar slassa Muman mōrdruing.
Drȯng in so, senchas nād oll,
fri tuirim lūad Lagenglonn,
nī ēicsem h-uile do glē
cid fri sægul sechtmaine.
A catha īar slūagaib slat,
d'ernmus a n-dorigensat,
a n-ār for drȯngaib derga,
a n-dīrmann, a n-dībergca.
 p.119
A slūaig, a cauraid cholma,
a fessa, a tāne, a togla,
a tuir, a trebaind trērig,
a fīanna co fīrfēnnib.
Fīanna Find, fāth cen timme,
h-ūi Bāiscne brecctais rinne,
fīanna Foil̇nge, forom n-glē,
fīanna Fothaid Canainne.
Is mōr tria gaile glīäid
gegnatar ann tria gnīäid,
mac Connaid ar cūrad crād,
Marcān ocus Māelodrān.
Labraid Loi̇ngsech līnib glec,
Crimthann ocus Bresal Brec,
Nūadu Necht, ba nūal co nem,
ocus Cairpre Niäfer.
Mess Gegra din gabuir glūair,
Find file mac Rossa Rūaid,
Cū Chorb, cethrur, clū nād sāeb,
ocus a h-indhūa Cathær.
Bresal Bēlach brosnaid chath
ocus Ēnna Gensalach,
Eochu mac Ēnna co n-gail
is Dūlȧng din Forcarthain.
Ailill, Illann, erctais rath,
ocus Brandub mac Echdach,
fer dobeir bann ar cach ̇m-būaid,
Āed mac Colgan chlaidebrūaid.
Is mōr ̇m-blīadna ̇m-bresta blōir
ō ̇flaith prīmda Partholōin,
co taurscur mac Mīled māir
dochum Ērenn a h-Espāin,
Ō flaith h-Ēbir, mēit n-ada,
co flaith Fīachach Fir Mara,
ō flaith Fīachach fri fessa
co flaith meic nīthaig Nessa.
Ō flaith Conchobuir Emna
co flaith Donnchada Temra,
dāig rofes, nī brīathar bras,
connāch ecnaid cen ēolas.
E.

@article{G100048,
  editor 	 = {Kuno Meyer},
  title 	 = {Do chomramaib Laigen inso sis (Mitteilungen aus irischen Handschriften)},
  journal 	 = {Zeitschrift für Celtische Philologie},
  number 	 = {8},
  address 	 = {Halle/Saale},
  publisher 	 = {Max Niemeyer},
  date 	 = {1912},
  pages 	 = {117–119}
}
 G100048.bib