unknown

Edited by Kuno Meyer

The adventures of Ricinn, daughter of Crimthann mac Lugdach

 145 aCrimthann mac Lughdhach diatā Crimthann la h-Ū Maine is ē cētfher di Chonnachtaib ro marb mnāi iar creidem hé. Ruccadh ingen di Chriomthand. Do ratad co mac Raith meic Naingin í dia baisted et ro baist. “A clēirigh”, ar Crimthann, “ag sin in ingen si deit ūaim-sea ⁊ don Coimdidh a cinta na mnā romarbus-sa dar sāruccud Dē.” Beiridh iarum in clēirech in ingen lais. Nos-altramann iaram co cenn secht m-bliadan í. Atnaig in clēirech leis co Cāirigh n-Dercain hī ⁊ mos-aithin aicce í do lēigenn lē. Āsaid in ingen iarsin eter ghenus ⁊ grēs ⁊ lēigenn ⁊ deilbh ⁊ dēnum ⁊ ālaigh ⁊ erlabhra. Āilli dono Cāerech Dergain inā gach duine di delbaibh na m-ban in tan sin ceinmotha isi. Nobīdh dano Cairech fiad cách cech die ⁊ nī faicthe ise fri feidm a lēiginn ⁊ a grēsa.

Indistir dono di rīg Tūadmuman .i. di Tipraite mac Foramáin maccaillech do beith i Clūain Bairenn .i. Cāirech Dergain ⁊ gurbo dingmála di rīgh í for a gúalainn. Cuirid side fer n-grāda dó do inneithiomh delba Cāirche. Ro-soich side iaram cosin airm ir-raibhe an chaillech. Is ann immorro robōi sidhe isind ecclais oc cantain a salm ⁊ an ecclais dūnta fuirre. Fēgaidh an fer í tria tholl na comla. Airigidh ind ógh innīsein  145 b. “A duine”, for si, “ticced cuccatt co lūath ercōit benus do shūil as  p.309 do chinn.” Ticc iaram peta cuirre robōi isin mainistir ⁊ berid cen fuirech a sūil asa chionn. Tēit ieram an giolla docum a tigerna ⁊ at-beir friss nā roibhe isin domun ben bud āille inās an ben at-connairc.

Cuiridh in rī coblach ar fad na Sinna co Clūain Bairenn for cenn na hingine. Faillsigthir don caillig a m-beith ag tichtain for a cend. Iadaidh Cairech ind eclais fuirri et diriact lucht na loingsi cusin dorus. “Tair amach”, ar siat. “Lēicidh cairde trī lā et trī n-aidhchi dam-sa”, for sī, “⁊ reghat iaramh.” Lecair di-si sin. Hi cind tredenais iaram at-beir si fri Ricinn: “Ēirg amach im richt-sa”, ar sī, “ar mo bennachtain cosin fer ūt, ar rochindes-sa m'ōighe din Coimde. Inghen immorro tusa ⁊ nī ro-chinnis t'óighe co se. Aircc didiu ar Dia amach im richt-sa. Gabaim-si immorro form ōn Coimdhe co nā ba lugaite di rath i nimh nō a t-talmain.” Naiscidh iaramh an inghen fuirri-si sin.

Tēit ina cend iarsin amach ⁊ as-pert: “Nī fúiiubh-sa leis”, for sī, “acht amedōn mo tīre ⁊ mo talman ⁊ ni reg amal mnāi m-bōaid lais”. Arāisin tra berair sī go riacht in Sinaind. Tēid iaram for cloich annsin. Atnagar an long ar a h-amus. Ardaigid in cloich uasin luing. Nī coemhnagair nī fōn samail sin. Tiagair ūadibh co tigerna ⁊ at-fiadat dō innī sin. “Ticed si im chomair-se co Maonmach”. Do-roich an fis cuici-si. “Nī fhēttaim-si techt cen ech”, for sī. “Nī filit eich linne”, for iad-som. “Is cett lim-sa in cloch so forsa fuilim”, for si, “corob í nomimurcora in conair at-berthai-si”. Glūaisid iaram for a cind in cloch co riacht Móenmagh co ro-airis ann. Conidh sī Lec Ricinde indiu ⁊ conidh impi ro-fothaiccedh in ceall tūaiscertach. Do-roich da Tipraite andes coricce in magh ittā in ceall descertach aniū. Et at-rubairt si nā faifedh fri Tipraite isin cill tūaiscertaig. Conidh aire sin dirōnadh in cell deiscertach. Berair si fodes iarsin et berid si mac do Tipraite .i. Dūngal, ō bfuilit cenēl Dūngaile eiside et do-nīther in cell deiscertach .i. Clūain Ceneōil Dūngaile.

Ba fedb irisech di Dia Ricend iartain, conidh ē sin dirad trīchait in tredual do Ciarān ⁊ do Dia et di Chāirich.

Finit

@article{G201032,
  editor 	 = {Kuno Meyer},
  title 	 = {The adventures of Ricinn, daughter of Crimthann mac Lugdach},
  journal 	 = {Archiv für Celtische Lexikographie (A Medley of Irish Texts, 6)},
  number 	 = {3, part 4},
  address 	 = {Halle/Saale},
  publisher 	 = {Max Niemeyer},
  date 	 = {1907},
  pages 	 = {308–309}
}
 G201032.bib