Airbertach Mac Cosse

Edited by Kuno Meyer

  p.497

A Dé dúlig adateoch/ Cethrur do-raega ní dalb

Commentary on the Psalms by Airbertach mac Cosse

1. A Dé dúlig adateoch,
   is tú mo rúinid co rath,
   rim-sa ní rosoa do drech,
   úair is tú mo breth cen brath.
2. Is tú mo rí, is tú mo recht,
   is let mo chrí, is let mo chorp,
   notcharim a Chríst cen chacht,
   úair is lat m'anim innocht.
3. Ní beo 'ca díchlith, a rí,
   rombeo it' rígthreib frim ré
   doroimliur in fleid dot' méis,
   nímfargba dott' éis, a Dé. A.
  p.20
4. Cethrur do-raega, nī dalb,
   
   Duīd fri cētal na salm:
   Asaph, Eman, ētrocht rūn,
   Ethān ocus Ithithūn.
 p.21
5. Radas-cōraigset fōn clais
   in cethrar co cēill cainmais,
   cīasu Duīd rodas-can,
   is dōib-seom da-aselbtar.
 46va
6. Deich cēt i n-dīaid cech fir dīb,
   ba slūag dīrecra dīrīm,
   fond ōenchlais ic molad Dē,
   cia ceōl bad ferr for bith chē? C.
7. Cinnas ro chanta in cech thur,
   in trīa prōis nō in trīa metur?
   is trīa metur, medar nh-glē,
   feib asind-fēt Cīrine. Cethrur.
8. Ōr h-esriud bātar, cīa bē,
   i n-amsir mōir-maic Iasse
   ina m-blogaib la cech dronhg
   do mebuir lasin popoll.
9. Estras dos-farglam īar tain
   i n-ord n-ōentad n-ōenlibuir,
   ro suidig rempu, rēil mod,
   argument ocus titol.
10. Cid nād gaibter in cach dū
    a tituil rasna salmu?
    dāig is dō thuctha, is dāil nh-glain,
    do sluinn sīansa asna salmaib.
11. Ardos-roet eclais Dē
    i n-ord n-etal n-airnaigthe,
    conid de gaibdi cen chol
    fir domuin a h-ur i n-or. Ōr.
12. Cetharda i salmaib, sēol nh-glē,
    cētna stair, stair tānaise,
    fo-gabar indib, nī gus,
    sīans sōer ocus morolus.
13. Is friu berair cētna stair,
    fri Duīd, fri Solamain,
    fri h-ingrintide na slōg,
    fri Saūl, fri Abisolōn.
14. Stair tānaise sluintir sunn
    fri Ezechīas, frisin popull,
    frisna rīgu, rēil in clū,
    fri Moīse, fri Machabdu.
15. Sīansa na salm cona snais
    fri Crīst cāid, frisin n-eclais,
    morolus īar sin for leth
    fri cach fīriān find figlech.
16. Sechtmoga blīadan ar bith chē
    bae Isaias ic fāithsine,
    fri rē cethri rīg, nād chēl,
    bātar for tīr n-Israhēl.
17. Ozias, Iotham, ētrocht dīas,
    Achaz ocus Ezechīas
    co luid martrai ¹ ar Dīa
    i n-deriud flatha Ezechīa.
18. Noī blīadna dēc ², brīg ro-clos,
    ō martrai mōir-maic Amos
    is ed sain do blīadnaib bīas
    co fāithsine Heremīas.
19. Do-rinscan fāithsine ar Dīa
    tres blīadain dēc Iossīa
    co m-bae ic fāithsine īar sain
    dā fichit blīadain is blīadain ³.
20. Do-rinscanad, cet ō chēn,
    fāithsine ard Etzechēl,
    trīa ficheit blīadan, būan cīs,
    buī ic fāithsine acht rē trī mīs.
21. Deichtreib do brith i n-doīre
    co n-immud a h-ilmoīne,
    dēitreb dīlsigthi ō Dīa
    sechtmad blīadan Ezechīa.
22. Deichtreb delbda, dingnaib dāl,
    ō ros-fuc Salmanazār,
    a dō cethrochat is cēt
    cōic blīadna sain srethaib sét.
23. Co rucad in dētreb dron
    i n-doīre la Nabcodon
    a trī, a deich is dā chēt
    do blīadnaib sain srethaib sét.
24. Ōn chētdaere ar deichtreb duind
    co trīall athnuigthe in tempuill
    cen chuit merthais mod ⁴ ron-snā,
    is fīr senchas, nī sechta. S.
25. Dā minfhāith dēc derbtait de
    ocus cethri prīmfāithe
    ro dānaigthe a dānaib Dē
    trīa secht fāthaib fāthsine.
 p.22
26. Trīa oibriud, aidbliu cach clū,
    trīa airdib, aidblib iliu,
    trīa fīssib Dē do gach dū,
    trīa aslingthiu, trīa ainhgliu,
    trīa guth anniūl, nāssad nh-glē,
    trīa thinfisin fāithsine.
27. Fāithsine na salm i fus
    do gein Crīst is dia baithius,
    dia frescabāil, in cach dú,
    dia cēssud, dia essēirgiu,
28. Do innarba Iudae, cen geis,
    do thabairt geinti ar ireis,
    do mōrad fīrinni Dē,
    do dīnsem cacha clōene,
29. Do messemnacht Crīst, cain clū,
    for bīu ocus for marbu,
    do h-eissērgi in betha,
    do delmaim in mōrchetha. Cetharda.
30. Cōic thintūda, cain in clū,
    at-chotaiter for salmu:
    tinntūd Simbaig, seōl co m-brīg,
    ocus tintūd saer Septīn,
    tintūd Cīrine, cēim nh-dil,
    tintūd Teothois is Aquil.
31. Tintūd Septīn, āssad nh-glē,
    is ē-side seichmit-ne,
    ro tintāiset sūid, seōl nh-dil,
    a h-Ebru, a Grēic i l-Latin,
    ro certaig Duīd īar ceist,
    fo obil is fo aistreisc.
32. Aurnaigthi dūthrachtach dil,
    airēgim ria fochidib,
    deprecáit fri Dīa, dīan mod,
    escoine co tairchitol,
    i salmaib sein, seōl as līa,
    cibē nos-gaba cach dīa. A Dē.
33. Trēde dlegair in cach raind,
    luic is amsera is persaind,
    at-chotaiter sunn san chan
    rīa nh-gressaib athar Solman.
34. Roda-scrīb Duīd ō Dīa
    i tīr airmitnech Iudīa,
    ros-cachain dō dín cach dū
    i n-orddun, i n-arddrīgiu.
35. Cipē nos-gaba īar fīr
    ricfaid ōentaid Hiruphīn,
    nī ba mac bāis īar nach breith
    bīaid it gnāis, a Dē dūlig. A.
36. A noī nochat, nāssad nh-glē,
    cēt comlān la cōic mīle
    ō thosaig domuin, delm nh-dil,
    co gein maic Dē i m-Bethil.
37. Ō gēnair Crīst, clū cen bēt,
    a dō ochtmogat noī cēt ⁵
    cosin blīadain bae cen chlith
    calaind Enair for cūicid.
38. In līn blīadan, mīlib gal,
    ō thūs domuin co cēssad
    fiche dā chēt is dā sē
    ocus ārim cōic mīle.
39. Ocht mh-blīadna dēc derbdait de
    acht fil co dīaid in mīle,
    i fail īar sain, sorcha in t-sreth,
    nī fitir acht Dīa dūlech. ⁶

A dē.

@article{G202007,
  editor 	 = {Kuno Meyer},
  title 	 = {Aus Rawlinson B. 502 [Cethrur do-raega ní dalb]},
  journal 	 = {Zeitschrift für Celtische Philologie},
  number 	 = {3},
  address 	 = {Halle/Saale},
  publisher 	 = {Max Niemeyer},
  date 	 = {1901},
  pages 	 = {20–22}
}
 G202007.bib