unknown

Edited by Kuno Meyer

 p.561

Aus der Kindheit Jesu

Aus dem Buch von Húi Maine, fo. 115a 2.

1. 'Sa rāith-sea rucadh Muiri,
   māthair Īsu foltbhuidhi,
   in ōg is fearr rugad rīamh
   ō tucad ceand 'sa cēdrian.
 p.562
2. Ar in leic tana-sa tshair
   da scar Muiri re māthair,
   tucad ō fhīndĀdham ind
   a himbāthad ¹ o hIachim.
3. Re slis in teampuill-sea tīar
   tāinic da guidhi Gabrīal
   ō tāinic līn Gabhrīal gil
   ba beangīall Rīgh in rīchidh.
4. Ar scāth na tuireadh-sa thall
   da scuch in rīgan roscmhall,
   rob imnār le Muiri mōir
   guide d'imrād ar fhīrōigh.
5. Ar in leic luim-sea lāim rind
   tāinic Crīt ina cholaind,
   darōine ar sīth mar sin
   gan díth ōige donn inghin.
6. In dā tulaigh-sea aratām
   da cuir dochur don domhnān
   dībh ro cabradh cland Ādhaim,
   adbar rand as rochrābraidh.
7. Dā mac is fearr rugad rīamh,
   Eōin baisdi is Īssu ar āenrīan,
   ro bo cubaidh a cagar,
   ōn dā thulaigh tāngadar.
8. Māthair Īsu as thulaigh tūaidh,
   rosc mall gas ōs a geal-grūaidh,
   māthair Eōin is tulaigh teas,
   sceōil reis nāch cubaidh coimeas.
9. Māthair Eōin būadigh baisdi,
   bean gan adbar dhíchaisgi,
   a rosc mongach nār mōr reacht,
   torrach 's an Ōgh a n-āenfeacht.
10. Āen da lā dacaidh ar cūairt
    māthair Īsu nārbh anshūairc
    d'fhis na mnā 'sa tulaigh teas,
    ro bo cubaid a cairdeas.
11. Nīr duine and mac Muiri
    a mbroind na cnō cubraidhi,
    nīr abaigh a feoil nā fhuil
    fa Eōin fan abaid n-ūasail.
12. Bidhgas a mbroind a mhāthar
    Eōin baisti is nīr baeth-lāthar,
    ō dha airigh a athair
    isin maigin mīnscathaigh.
13. Lēigis Eōin ar a glūinibh
    tall isin gil gormshūiligh,
    beg nāhar toll a taeb geal
    in craeb dond gusin dūi-leamh.
14. Tig Muire da tig atūaidh
    gusan dūn-sa gan dimbūaid,
    a slis blāith-si 's a barr glan
    tall isin rāith-si rugadh.
15. 'San rāith-sea darindead fōs
    oileamain Crīst fa chētnōs,
    da bī Rī nimi in seang saér
    treall as nr miri macaēmh.
16. Lā dacūaid mac Muiri amch
    'na macām data dimsach,
    fear feadhma deas ar gach ndān
    da nderna cleas na croān.
 p.563
17. Crocān a lāim gach leinim
    gusin fūarān foithreamail,
    cuiris Muiri mear nār tuig
    fear a toigi don tibraid.
18. Brisis Crīst a chrocān fēin
    risin macraidh co mīchēill,
    airead copān mīn don muigh
    do chrocān dīb ní deachaid.
19. Ēirgid co Muiri mnā in tshlūaigh
    da chasaeid Īsu a n-aenūair,
    teagaid don bondbāin bāghaid
    congāir 'mana crocānaib.
20. Ēirgid mac Muiri mōiri
    re greasacht na glanōighi,
    nī rūacht bas leabur nā lām
    ōn leanam chas gan crocān.
21. Blog don chrocān na cēili
    da cuiread flaith findgrēini,
    ger tseang a trāth is a traigh,
    nīr fearr a thāth ō thosaig.
22. Aig sin reabrad darōini
    macām mīn na mōrōigi,
    in blāth derg, in bili bān
    mo chraidi ceard na crocān.
23. Lēim beg ele tug a traigh
    asa beind-sea ar ar mbēlaib,
    lēim don beind fūair d'araile
    ina stūaigh theind tsheabcaidhi.
24. Mac fir in baili-sea abus
    tāinic taem dō da dīumus,
    fūabris fēin in cleas cētna,
    beas ro bo rēim rodēdla.
25. Leingis a ndiaidh meic Muiri,
    nī toracht trīan conairi,
    fūair ar sās na flatha in fear
    bās, ca fatha um nāch fuígbeadh?
26. Ēirgid sūas co Muiri mōir
    lucht na cathrach a cēdōir,
    teagaid a n-aigid uili
    ar in raghil rīgnaidhi.
27. 'Nā measgaid ar mu māthair!'
    ar Īsa in fhuilt chlaenrāthaigh,
    'tiucfa in mac cētna ar bar cloind',
    ar in tshlat dēdla dīgaind.
28. Dēchain ro dēchsat na slūaigh
    re hōir in maighi mongrūaidh
    adcīd mac Muiri 'sin magh,
    's an tshlat oile 'na adrad.
29. Airsin gairthir a gairm rīgh
    do mac Muiri na mōrgnīm,
    rāiti rī risin ngīall nglaānn
    da bī rīam arna rīgad.
30. Teagar in tulach atām
    da uiri cona macāmh,
    port saer  115b2 a raibhi rabhāigh,
    baili na naem Nesarāith. S.
31. Adlochur da Muiri mōir
    in leac da bī fan mhānōigh,
    in stūag-sa da bhī fa bond,
    in clī trūag-sa 'ga tadall.
32. In feōil beg-sa 'sa bruindi
    da chum Īsu umainni,
    in corp tlāith-sea nāch dūal damh,
    trūagh nāch 'sa rāith-sea rugad!

Sa rāith.

@article{G208002,
  editor 	 = {Kuno Meyer},
  title 	 = {Aus der Kindheit Jesu (Mitteilungen aus irischen Handschriften)},
  journal 	 = {Zeitschrift für Celtische Philologie},
  volume 	 = {8},
  address 	 = { Halle/Saale},
  publisher 	 = {Max Niemeyer},
  date 	 = {1912},
  pages 	 = {561–63}
}
 G208002.bib