unknown

Edited by Kuno Meyer

Bai fer amnus do Ultaib, Connall Cernach mac Aimairgin, loech is dech ro bai ina remis a n-Erinn. Ba mor a crodatu .i.  p.103 fer na dechaid asa n-aindin riam erat ro bai gai ina laim gon cenn Connachtaig lais. Do rala fri Connacht co mór, oir do marbsat-som a braithri. Ocus ni raibi do Connachtaib immorro fer na ro marb-som a mac nó a brathair nó a athair. Ocus ro marb-som tri maic Oilella ⁊ Medba ⁊ is e dino ro marb Bélcu Brefne ⁊ a tri maic ⁊ is e ro marb secht maccu Mágach do Connachtaib .i. Anlúan mac Magach ⁊ Docha mac Magach ⁊ Mag Curp mac Mágach ⁊ Find mac Mágach ⁊ Scannlán mac Mágach ⁊ Cet ⁊ Ailill mac Mágach. Ocus is e ro marb Ailill mac Mata Muirsci do Connachtaib, oir ba h-í a mathair-som Mata Muresc, ⁊ mac son immorro Rosa Ruaid do Laignib. Ocus do cosnum rige Laigin do cuaid-sim siar ⁊ ro gab-som rige Connacht fo deigh a máthar thiar ⁊ sloinned in maic a tir a mathar tucad fair-sim tiar.

Do rorchair immorro lupra ⁊ truaigi fo deoigh for Connall Cernach iar marbad a cumalta .i. Conchobair ⁊ Con Culaind co torchair cumha ⁊ troige ⁊ claime mor fair-sium, co n-na rabi nert 'na cosaib do imthecht. Ocus ro imraidh sim aici cia teglach a rachad dia gaire ⁊ dia bethugud.

“Ailill ⁊ Medb am”, ar sé, “is iat sin lanemain dia ticfa mo lesugud-sa. Acht is mor mo faltanus friu cena, ocus; cid mor chena, bid eigin a imdol ann”, ar se. Luid iarum a aenor co rainic Raith Cruachan ⁊ luid isin raith ait a m-bai Ailill ⁊ Medb. Ocus feraid Ailill failti fris.

“Is mochen duit”, ar Medb, “a Connaill, acht cena  4 ar si . . . . . . . . ar Conall, maith do denum form . is . . . . . . . . didiu don ti do ni form. Ra-t-fia am failti”, ar Medb. “Denthar tech fo leith . . . . . . for mur na ratha”.

Do nither tech dó ⁊ beror muc ⁊ ad ⁊ fuigell Medbe ⁊ Ailella ⁊ da bargin déc ⁊ molt ⁊ in cori anbruithi, ⁊ caith-sium sin uili a n-ainfecht. Do ni-sium tochailt co mur na ratha ⁊ do nid-sium a daithin gach n-oidci a Connachtaib ⁊ ticedh ria matin dia tig.

Bliadan lan doip ac a biathad fon alt sin ⁊ in combfeith cétnai do denum do-som fris-sin. Is ed no arfitedh Connachtai gach lai eisin ac a indisi doip amail no marbad-som a maic ⁊ a  p.104 m-braithri ⁊ a n-aithri. Do bertis Connachta a n-gai do dia n-imsn. ⁊ dia snaide ⁊ ro imsnad resiu ro eirgedh gach bo.

Mor tra cumachta ⁊ armitin ⁊ ordan inti Medba ⁊ ba mor a h-acobur im gach ní .i. tricha fer cach lai do claemclodh di nó tagall Fergusa aonfecht. Ba comaosa di-si immorro a ceili .i. Ailill, fer cin ainim .i. cin ed, cin omun, cin neoid. Ba maith a chruth ⁊ a brig ⁊ a breth an fir sin .i. in fer no bith ac imirt fri h-Ailill, no ticed gilla Meidbi dia gairm do comrac fria. Ocus is ed aderad Ailill: “An bhic co tair in cluithi”. Do comraiced-som fria mnaib aili dia cind si ⁊ ba h-ét le-sium anní sin, gu r-ro gab si Conall Cernach ina tegus for Ailill na dernad aní sin tar a cet.

Laa n-oen ann matin moch a cetemain bai Ailill a com-riachtain fri mnai a taib in lis. Bai diu Conall ac imsn. gai forsan raith. Do luid dono Medb amach, oir do fitir si in cetlud. Ro bui craeb cuill fri taob na lanamna for gluasacht, co facca Medb aní isin. “Maith, a Chonaill”, ar Medb, “Conall Cernach t' ainm-si cus aniu. Conall Cloentruag t' ainm festa. An t-an rob-som Cernach-som, ni lemtha techt tar do ráthaigecht. Aniu is focus duit in sarugud ut.” Ro imraid iarum Conall, “bai digal Fergusa ann am!” ar se, ocus nu-s-certoigenn in gai cuca, co tarla a n-Oilill on taob co araill, nó comad a fastig no-t-guin tria n-a tuighi suas. Luid cách cuci ⁊ do berait leo anunn h-e.

“Cia do roine?” ar cách. “Conall do roine.”, ar Ailill. “Amai! ni fir om”, ar Conall. “Is fir”, or Medb. “Mas fir dono”, ar se, “ata digal Fergusa ann.” “Olc duit a n-dernais, a Conaill”, ar Ailill,  p.105 “olc do denum frim-sa. No-t-ber em as dom' inchaib, resiu ba marb-som. Ar no-t-muirbfet Connachta iarm' ecuib-som.” “Lor lem”, or Conall, “co n-dechur am' carpat a n-dorus in lis.” “Ni ba marb-som frisin”, or Ailill.

Luid ina carpat. Marb Ailill tall fo cét oir. Iarsin tra ro dibraicsit Connachta com-mor eisim. Marbaid-som sochaidi mor dib-som. Ba geis do-som dol a n-ath gan sithlod ina diaigh. Batar mianaigi ac nide mianaigh isin abaind leth fuas de ⁊ no ticedh a buadred sin cuici, conid ed sin do fust re cach, co torchair leo iarsin ar cur air Connacht. Na  5 trí Rúadchoin Martine do Feraib Muigi is iat ro bensat a chenn de .i. do Ernaib dóib-som ⁊ i tegluch Ailella ro batar ⁊ asin digail Conraig rucsat a cenn de. Ocus in tan ro batar ac a airlech, is and tanic Medb isin iarmóracht. Medb: “a cenn ban berrtha ⁊ rl.”

Rucsat sein leo cend Conaill a n-agaid (?) Conroi. Rucsat Ulaid leo fo thúaid ⁊ ata tiar fós in cenn. Toilled cét rigghamna ann nó cethrar ac imirt fidchilli nó lanamain a cosair. Ata  p.106 a tarngire do Ultaib a breth bud thes aris ⁊ doicfa a nert cétna intib aris acht co n-ebat as as ⁊ is de sin ata: dith Ulad le dith Ulad. Adaid Ailella ⁊ Conaill Cernaig co n-nuici sin.

@article{G301019,
  editor 	 = {Kuno Meyer},
  title 	 = {Goire Conaill Chernaig i Crúachain ocus Aided Ailella ocus Conaill Chernaig },
  journal 	 = {Zeitschrift für Celtische Philologie},
  volume 	 = {1},
  address 	 = {Halle/Saale},
  publisher 	 = {Max Niemeyer},
  date 	 = {1897},
  pages 	 = {102–106}
}
 G301019.bib