unknown

Edited by Kuno Meyer

Inní díatá Cuislinn Brighde ⁊ Aidhed Meic Díchōime

[1] [B]āi rí amra for h-Ib Failgi fecht n-aill .i. Eochaid a ainm. Būi ainim mōr forsin rīgh .i. dā n-óó eich (nó pill) fair. Is amlaid immorro boī in rí ⁊ mind n-órdha 'na urthōcbālta ūas a chind do díchleith a ainmbe. In inbuidh immorro a berrtha no thēghed i fássaigibh ⁊ dīambraib ⁊ i n-āiddib dīcheltaibh dia berrad. In berrthaid  p.47 immorro nī thiced cen a marbad. Ba sí insin dūass ⁊ duilgine a berrthadha.

[2] Boī immorro mac brāthar dó ina thegluch. Ōengus a ainm ⁊ nī h-ed don-gairthi acht Mac Díchōime, ar bá Díchōem ainm a máthar ⁊ is ūaithi no ainmnigthe a m-mac, ar ba maith in máthair, cīarbo díchōem. Occlāech dono án amnass airgech ē-sede ⁊ is é no berradh in slūagh ⁊ is lais no bíd cerd glēsta a n-ech. h-É dono no indsmad a slegha ⁊ a sithslata ⁊ a n-goī ⁊ a l-laghna lethangéra. h-É dano nodas-pettad di fhethchoisig ⁊ timpānacht, do dhūanaibh ⁊ duchannaibh, do fāthrannaib h-espa ⁊ airchetail. Bá án dano h-ellomglicc int ī-ssiu h-ic snām ⁊ h-ic selgairecht. Ba h-urdairc i cerdaibh gaile ⁊ gaiscid int ī-siu .i. Ōengus mac Dīchōeme, co m-ba sercaid  52b2 sænimail ar grádh ⁊ inmhaine do feraibh ⁊ do mnāib. Ocus cid in rīghan .i. bean Eochadha nī fhūathaighedh a h-urscēla ⁊ ar-fæmfad a chomlaige, dīa m-bad chumma thol dia fir feisin ⁊ dīssi.

[3]  Ro līad ttra ind rīghan fon scēim sin for mac féta fin[d] Dīchōeme, co cūala cāch ⁊ co cūala in rī .i. Eochaid. Tnūthaighis tra in rī fria [mac a] brāthar ⁊ mīannaighis dia mharbad. Ba meabul lais dono a marbad tria ét, co tāncatar techtaire a dochum maic Dīchōem[e] ara tīssadh lais di chūairt araile fāssaigh. Et dí fāthaib dono do-cūas cuca-som sech cách ar mhīan a berrt[h]a, h-ūair tāinicc impach in berrtha, ocus do dhīgail ⁊ do h-indechadh a fergi ⁊ a h-eōit fair īarma īarna berradh. Bá tār mōr laisna slōghaib a n-ní-sin, ar ba derb lethu ar nā tīssa[d] int í-sin Mac Findchōeme īar m-[be]arbad in rīgh, feib nā toracht nech rīam reme.

[4]  Luidis in gilla lais insin fāssach ⁊ fo-gabat fāstech and. “Ba ferr dūn ar m-berradh”, for in rī, “fo bīth is ar n-ūathadh.” “Am imtūailnge-se dono”, ar in gilla, “do dagh-berrtha”, ⁊ no-mberrand īarsin. “In maith ⁊ in maissech fil in cenn-sin īarna nūaberrad?” ol sē. “Is maith dano”, ol in gilla, “⁊ rop ferr ar cāch bess.” Righidh in rī a lāim do indsaigid a claidhib do marbad in gilla. “Meise no-mbēra”, ar in gilda, “⁊ do-bēra bēim de h-it chend-siu, a fhinghalaigh, co nā derna finghail for nech n-aile dom h-ēissi. Faicfe do mnāi ⁊ do h-orbhai ⁊ t' atharthir ⁊ do rīghi donn lō-so, a capaill chlūasmhár brēnchinn! Do-cicheta ilslōigh ⁊ sochaidi lium-sa do chenn īarna bein dīt”, ⁊ nochtais in gilla in claidheb ⁊ tōcbaiss ūass a chind dia thairbert fair ⁊ dia marbad. “Dess Dē thairiss”, ol Eochaidh. “Ní h-eadh  53a1 bīas etrunn, a gillai. For-bīa-ssa h-i comtomailt ma grāda-sa ⁊ tussa nom-berrfa dogrēs, acht ba maith  p.48 do rūn arna facca lim-sa.” “Bidh maith”, ol in gilla, “⁊ iss ed bīas and cairrdine tuillid don sceōl-sa.”

[5] Dolotar īarum dia tig a ndís ⁊ ba fāilidh in slūagh di sain. Ba galar mōr immorro don gillu gabāil im a rūn, condarulád h-i serc sīlige ⁊ h-i mbruth ⁊ i clamsaine ⁊ h-isin tróge cen nert, cen lāthar. Luidh in gillai laa n-ōen ann do īarair leigis ⁊ lesaigthi do thig araile fāthlegha bōi h-i nGensilliu. Occ techt dō dar Mōna[i]d Cōemtechta h-i nGensiulliu dofuit for a bēolu, co rōemdetar teōra fetāna fola asa bēlaib ⁊ assa srōnaib ⁊ bá slán di sain in gilla.

[6] In lá aile h-i cind blīadna dochōid in slōgh ⁊ intī mac Dīcōema cosin maghin cétna i torchair ⁊ in ro-scē a rún ⁊ h-incoisscid don slūagh: “Sunna” ar sé “romīcad-sa ⁊ ro-scēos trī srotha fola,” ⁊ turcbais r[a]ind:

1. Sunna ro-hīccad amne
   intī siu mac Díchōeme
   do scēith 'ma rūin, rūathar ngarb,
   for Eochaid n-ūathmar n-agarb.
2. Dīa lod d'īarair mo leigis
   īar mbliadain rūin ro-gabus
   romchuir h-i seirg seimne sé
   h-im-meirbe ocus h-im-mīgnē.
3. Fetdāin fola, ferrde dam,
   darm bēl, darm srōin ros-ralad,
   rodāil mo Dīa h-i crunna
   condat cia filet sunna.

S.

[7] Iar sin tra doroacht aroile fer cerddha do h-innagaid Eochach a tīrib Muman .i. cruittire amra ēside co aithib aurchetail. Iss ed dono do-rala, for cōi don crū cusna flescaibh ⁊ bātar h-i comdēscin na flesc. Co n-epert ind flesc fri araile: “Eochaid fer scēith, dā n-óe n-eich fair.” Rāidsit in sin fo trī. “Is maith dūn adhbunn de-seo for ar cruit,” co n-epert:

1. Comrād na flesc, cech ladna,
   nipsam lesc ra lūathlabra,
   dogēnath adhbann triam chruit
   corop adband ard urdairc.
 p.49
2. Eochaid fer scēith scenmda a sccuir
   dā n-óe n-e[i]ch ro-glenamair,
   rāidsecha sain na slat slān,
   torud cocuir is comrād.

C.

[8]  53a2Luid 'ar sain in cruitire do thigh in rīg ⁊ ro-ferad fāilte mōr fris lasin rīg. Bertair dano h-i tigh lighi ind rīg. “Sennaidh” for sē, ol Eochaid “cruit menmannraid dūn!” “Maith dūn,” ol sēat. Insucut do senmaim dó ⁊ i[s ed] sennait īarum .i. “Eochaid fer scēith, dā n-óe n-eich fair.” “Tucthar tene ⁊ caindel isin tegh!” ol in rī. Feib dorūacht in tene ⁊ dorocratar na caindle ⁊ na sutralla solasta: “Oirgidh” ol sé “for broinne na cruitire ⁊ no-dos-cenglaid!” ⁊ docūas ōn focētōir co ro-cenglaid ⁊ bātar co matain 'na cengaltaib.

[9] Ticc in slūagh arabārach. “Robo ferr” ol na cruitire “cen ar marbad co fessa tú ar cinaidh rīasiu ro-marbtha.” “Oirged cāch imach!” ol Eochaid. “Atmhaidh,” ol sē, “cīa ō tuccsaid in adhpund ucut.” “Is ed inso,” ol sēat. “Na flescca ro-cansat dūn, iss īat ro-hās[a]tar a scēith maic Dīchōeme.” “Is fīr,” for sē. “Is annssa do dāinib gabāil im rūnaib ro-dochtaibh, an tan nāt cumgat cidh na crainn gabāil fair. Fūaslaicidh donaib cruitirib!” for sē. Gataid a cathbar[r] dia chiunn: “Is so amail tū-ssa,” ol sē, “a h-uu Failge!” Co n-epert:

1. Cathbarr 'mom cenn, bá mod mór,
   do dhín mo locht for cach slōgh:
   ūand ūair siu sūas co līn mbla
   do dīn mo clūas nī thiccfa.
2. A h-ūi Failge, fēgaid sein
   clūassa Echach dā n-ōe n-eich:
   nī ceiledh cāch h-ic a thigh
   clūassa Echach d'fhírfaiccsin.
3. Mōr in monor rún im nī,
   dūr a dēnam dom ēissi,
   a aithle cāich ro-dass-marb
   ba h-aithne āigh, ba h-aggarb.
4. Nī fētfa nech rún amne
   a aithle maic Dhīchōeme,
   ' sa h-aithle scēoil na trī crann
   mé dom dheōin nī gēb cathbharr.

Cathbarr.

[10] Luid immorro [mac] Dīchōeme cosna flescaibh īar d[t]ain, co ndergenai cuislind ndēgabail dīb. Ocus gabais īar sin rīghe i ndegaid Eochach ⁊ cīa ro-gab rīge, nī ro-scar fria chuisslind.

@article{G302002,
  editor 	 = {Kuno Meyer},
  title 	 = {Stories and songs from Irish manuscripts VII: King Eochaid has horse's ears},
  journal 	 = {Otia Merseiana},
  volume 	 = {3},
  address 	 = {London},
  publisher 	 = {Th. Wohlleben},
  date 	 = {1903},
  pages 	 = {46–50}
}
 G302002.bib