Unknown author

Edited by Kuno Meyer

Reicne Fothaid Canainne

1. Reicine Fothaid Canainne, H. 3. 17.

Būi rígféinnid; for Condachtaib fecht n-aill .i. Fothad Canainde. Brāthair side ⁊ Fothad Airgtheach ⁊ Fothad Cairpteach. Is de asbertha na Fothaig friu .i. fotha-suith iat, ar isí cétchlann ruc Fuinche iat ¹ do Macnia. Nó Fothad ⁊ .i. fó-táide .i. fo clith dorōnad la Mac Niath iat fri Fuinche ingin Náir maic Armara. Nó Fothad .i. fī-āeda .i. olc-teine .i. teine neimneach iat ic orcain clann ⁊ cinēl. Aendia immurro ⁊ Trēndia ⁊ Cāendia a n-anmanna. Aendia in t-Airgteach, Trēndia in Cairptech, Cāendia Fothad Canann.

2.

D'ōentoirpirt ructha iat a triur la Fuinche ingin Náir. Arsisbis do Lugaid mac Con, ut ali dicunt. Breatha Fuinche Aendia i tús aidchi; is de isberar ainm dō, ar ba gein rīg ar febus in thseōin. Tréndia a medōn aidche. Is de dobreath ainm dō ar treissi in thseóin lasna dēib and. Cāendia issin maidin; ar cāime ⁊ ar āille na fungaire na maidne ⁊ ² is aire is Cāendia a ainm. Is dōib-sin rochan in senchaid ³:

1. Trī Fothaig Elcca cen on,
   trī maic Luigdech maic Garrchon ⁴:
   resiu rob Fothaid na fir
   caide a n-anmann re taidbsin? ⁵
2. Āendia ocus Cāendia cing
   ocus Trēndia, nī ceilim, ⁶
   it é sin, forcanat blad,
3. anmand co fír na Fothad. ⁷
   Óendia in t-Airgthech na clann
   is Cāendia in Fothad Canand,
   is Trēndia in Cairpthech atchīd
   imda airgtheach 'con Ardrīg.

Tri F.

 857Mad iar n-araile, is de isberar Fothad dīb .i. fō-suith .i. fō maith .i. fotha maithi .i. clann sainemail iat. Fothad Canand, is de isberar .i. ō Canaind, ōn choin robói aicce, unde ⁸ Canund i Maig Life dicitur. Nó Fothad Caenine .i. cáin .i. ālaind in dee intan nodrucad.

3.

Fothad Airgtheach, is de isberar, issed indmus ba hannsom leis, ar ba head a buindi niad ⁊ a dī falaig ⁊ a muntorcc.

4.

Fothad Cairpthech, is de asberar, ar issed slabri conīrad: mairc cona cairpthib ⁊ is fris adertai Fothad Dolus.

5.

Ba hān ⁊ ba hairgteach intí Fothad Canainde. Ba mind teglaigh ⁊ slōigh. Bói fiann lōech ⁹ amra lais. Ba derscaigdech side ar erriud ⁊ grāin ⁊ ordon ⁊ dechelt ⁊ tairpige sech ógu na haimsire sin.

6.

Bāi dono rīgfēinnid amra la Mumain in tan sin .i. Oilill Flann Becc. Bói imarbād eturru diblínib ⁊ dogēnsit creich n-eturra. Ba hamru delb Fothaid ol bái Oilill, acht ba hamru ben Oilella ⁊ ba hāille oldās ben Fothaid. Luid iarum Failbe ō Fothud do thochmarc a mnā do chind Oilella. Ispert sí ni targad leó con- darbad a tindscra dí. Conmidir a tindscra .i. miach óir ⁊ miach finddruine ⁊ miach crēdumai. Rāidid Failbe fri Fothad in n-aithesc sin. Ispert Fothad rodabiad indī sin. Imchomarcair in ben ciped hé cruth forcuingabad sōn nodgēbad. Ispert som bādur sé semmanda a sleig cech fir do muntir Fothaid .i. dā seim  858 ōir ⁊ dā seim airgid ⁊ dā seim finddruine ⁊ nogédais tri semanda as cech sleig ⁊ fuicbidis tri semannda in cech sleig ⁊ dolínfaidis tri mēich dīb .i. miach óir ⁊ miach airgid ⁊ miach crédumai.

7.

Dolluid si iarum i ndāil Fothaid ⁊ berid ar aithidh leis hí. Luid dono Oilill Flann Becc lín a fiann ana n-íarmōracht a mná, co comarnnic fri Fothad issinn aidchi cétna, co fersat imairecc a ndib fiannaib. Conrothacht comthrascrad dōib. Docer Fothad ann ⁊ díchenntar. Dobreth in ben dothāet i ndāil Fothaid a cheann chuicci issin firt i mbí. Cachain cenn Fothaid in reicne don mnāi annsin, conid ann isbert:
“A ben nāchamagille” ⁊ rl.

8.

1. A ben, nāchamaicille!
   nī friot atá mo menmo:
   atā mo menma collēic
   isind imairiuc oc Féic.
2. Atā mo corpān crūäch
   i taobh Letrach dā mbrūäch,
   atā mo cenn cen nighe
   eitir fiena for garbhslighe.
3. Dochta do neoch dáles dāil
   fācbas ¹⁰ dáil n-éco fri lāimh;
   in dāl dālto co Clárach
   tuärnect im robánadh.
4. Rodelbad dūn, trūagh ar fecht,
   for Fēicc doroirnedh ar lecht,
   imonrōiraid, bāg ma liūin,
   totim la hóga aniūil.
5. Nī mē m'aonor im-mūr thol
   docōid fordal i ndáil ban,
   ní ar aithbiur cid ditt ágh,
   is duáigh ar ndedhendál.
6. Do cēin doroächt do dāil,
   bāi grāin for mo choicne máir,
   ma dofesmais bid amne,
   bá assa nī tairistæ.
7. Bá ó Fothud 'na h-uthair
   bertis co hūair dorochair,
   cidh amne, nīth fri fochaidh,
   nī cen folad guin Fothaid.
8. Nīmrumart-sa mamasrad
   fien gormainech goburglas,
   a techt i nhúire adba
   dirsan dond eōchaill amra!
9. Matis ēisium batis bī,
   rofestais a tigernai,
   mainbad tairbad báis dīmair,
   lem nī bud fien cen dīgail.
10. Co a tigdāil batar lúaith,
    atcosnatis bidbad búaidh,
    foscantais raind, trom a ngāir,
    cinsit do chlaind ruirech rāin.
11. Be hē fiallach seng subaid
    gusin aimsir hirrubaidh,
    arusfōet caill duleglass,
    ropo coigne uleamhnas.
 p.12 134a
12. Domhnall derccdige armach,
    ba hē Lug na fian fadbach;
    isind áth, ba dūire daol,
    is leis docer Congal Cáel. ¹¹
13. Na tri Eogain, na tri Flainn,
    batir allata ēclainn,
    dorochair cethrur ¹² cech æ,
    nīrbo cuibrenn drochlaige.
14. Trait donroïg Cū Domna
    oc ascnamh a comanmo,
    faigēbthair colaind Flaind Bic
    i telaig inn imairic.
15. Tāthud daith comhul,
    is dīograis do Choncobur,
    dīograis totim nEogoin Rūaid
    frisin abaind anairthūaidh.
16. Tāthud ochtar ¹³ la suidiu
    airm hi fail a crōlighe,
    ciarbo airmeirb lend aithli
    aithforgaib maic Mugairni.
17. Nī meirb dofich Falbe Flann,
    frisloisc fiena a thētbann,
    leblaing Fercorb, gorm a chlī,
    co rohuicc secht cētguini.
18. Comrac Mugairnd fri Mugna,
    batar dā chuilēn cholma,
    manistīsedh fien forbar,
    ropad inir a congal.
19. Foceird a n-oman cach tūaith
    cain dothfasuith Falbe Rūaidh,
    immusapth-atar, gann glē,
    re cách ar ndā deogbaire.
20. Sæth mār fri luga dige,
    bitscaradh fri tromthuile,
    domuiniur domruïs fēin
    céini rogalta in fēin.
21. Dā laoch deacc tul fri tul
    bātar frim i n-imarguin,
    ní ̇fil cidh ōenfer de sin
    nātt fārcbainn i tinorguin.
22. Iarsin imcuirsim dá sleig
    meisi is Oilill mac Eogoin,
    cectar nāthar dībh atbath,
    amhainsi dā thenn forgabh,
    imaptha dūn, ciarbo bōeth,
    ba hē comrac dā ndeglāech.
23. Nā tuinithe aidche ūath
    illeircc eter lectaibh cúan,
    nī fiu cobraim fri fer marb,
    fodruim dot daim, ber lat m'fadb.
 p.14 134b
24. Atotfugēra cech dóin
    nī bu hētach nach dīchōimh,
    fūan corcra ocus lēine geal,
    criss arcait, nī haicde mer.
25. Mo sleg cōicrind, gæ co fī,
    diemtar mence cētguini,
    cōicriuth co mbūale umæ
    darsnatoingdis derbhlugæ.
26. Astōidfa frit, sét collī,
    finnchuäch mo deogbairi,
    m'ōrnasc, m'folaig, seōid cen táir,
    dusmbert dar muir Niä
    Nāir
27. Éubá Cāilti, delg co mbail,
    ba dia aicdibh adamhraib,
    dā chonn arccait im chonn óir,
    is aicde maith ciasa fóil.
28. Crib fódaroinn, fola fuin,
    forfleisc crēduma fam muin:
    atā uile, is fodb sōer,
    in t-airm i torchair mo thaobh.
29. Is dūal deit-si, sét nāch lag,
    m' fithchell, adarella lat,
    bruinnit fuil sóer for a bil,
    nī cien di sonn indasfail.
30. Is mór colla cúan rinnech
    sán chán immo deircinnech,
    dosneim dos dlūith dairpri rūaidh
    i taob inn firt iniertūaith.
31. Oco cuinchid duit dollēir
    ní rob mór nolabrathar,
    nī tharla celtair talman
    dar dūil badit n-amhrathor.
32. Leath a foirne ór buidhe,
    alaile is fiondruine,
    a hindech do margarét,
    brecht la certa cía rét.
33. Cetheoir ¹⁴ coinnle, soillsi bán,
    nī meirv forosnat a clár,
    beuil inna tein, scél nād gó,
    ní randath na roidhmethau.
34. A ferbolc, is amra sceúil,
    de ór imdernta a beúil,
    glas forfācoibh fair in súi
    nāchunursloicce nach dúi.
35. Criöl chetharchuir, is fóil,
    roces de dūalaib dergóir,
    dron forfuirmedh i suide
    cét uinge do fionndruine.
36. Ar is de dūal dergōir druin,
    dobert Dīonoll cerd dar muir, 135a
    cid óen a siball namá,
    mesa fri secht láichesa.
 p.16
37. Imostúaruscbat cumni
    is di prīmhaicdib Turbe,
    i n-aimsir Airt, bá rí tét,
    is ann dogníth Turbi trét.
38. Rofecht impe mór ngretha
    la ríg Rōmhān ilLetha,
    iar n-ōl fíona, ba mesc linn,
    is ann foillsighti do Find.
39. Nīcon deirgensat cerda
    aicde frisa samhlathar,
    glē lim nī forlaig híriu
    oc rīg sēt bat n-amradar.
40. Dia mba trepar imma lōg,
    glē lim do chlann nī ba trōgh,
    ma duscoisis, aicde druit,
    nī bo cres nach cinēl duit.
41. Atāat immunn san chan,
    mór fodb asa fordercc bol,
    dreman inathor dīmar,
    nodusnigh an Mórríoghan.
42. Donārlaith do bil ōige,
    isī cotanasōide,
    is mōr do ̇fodboibh nigius,
    dremhan an caisgen tibhes.
43. Rolā a moing dar a hais,
    cride maith recht nodaais,
    cid gar di sund úan i mbé,
    nā fubthad uaman do gnē.
44. Mad cose dam fri gábud,
    nīmgaibthi frim idsnádhud,
    a banscál, nogabtha for,
    cāin blāth fa roscarsamur.
45. Scarfat fri daonacht don mud
    'sin madain īer maccānrud,
    airc dot daim, sonn nī ainfe,
    dofil deöidh na haidchi.
46. Imusráidhfi neach nach ré
    reicne Fothaid Canainne,
    mo chobrad frit nī hinglae
    má imrāite mo thimna.
47. In dul bidh coimtig mo lecht
    rosáiter mai, menn in fert,
    ní hescor sáitha atchī
    dot ̇fochuidh īer t'inmuini.
48. Scarfid frit cēin mo chorp toll,
    m'anum do pīenadh la donn,
    serc bethu cé is miri,
    ingi adradh Rīgh nimhi.
49. Is ē in lon teimhen tibius
    imchomarc cáich bes hires,
    sīabra mo chobra, mo gnē,
    a ben, náchamaicillé!

A bhen.

@incollection{G303016,
  editor 	 = {Kuno Meyer},
  title 	 = {Reicne Fothaid Canainne},
  booktitle 	 = {Fianaigecht},
  address 	 = {Dublin},
  publisher 	 = {School of Celtic Studies, Dublin Institute for Advanced Studies},
  date 	 = {1910},
  date 	 = {1937},
  date 	 = {1993},
  note 	 = {1–17: 4–16}
}
 G303016.bib