Unknown author

 p.92

Caíni amra laisin m-Bran

Manannán, god of the sea, describes his kingdom to Bran and predicts the birth of Mongán

Imram Brain par. 32 Luith īarum Bran ara vārach for muir, tri nōnbuir a līon: aonfear for na tri nōnburuaiv dīa chomaltaibh & comaīsaib. Ō ro buī dí lā & dí aidchi forsan muir co n-aci a dochum in fer isin charput īsan muir. Canaid in fer hīsin dano tríchait rant n-aile dōu, & sloinnse dōu, & is-bert ba hē Manannān mac Lir, ocus as-vert bāoi aire tāoidecht n-Ērinn īer n-aimsiruiv cīanaiv, & no gigned mac hōad .i. Mongān mac Fīachnai iss ed forad-mbiad. Cachuin īerum in tríchait rannsa dōu:

1. Caíni amra laisin m-Bran
   ina churchān tar muir n-glan;
   os mē, am charput do chēin,
   is magh sccothach ima-rēidh.
2. A n-us muir glan
   don nāoi broindig a tā Bran,
   is Mag Meall co n-iumat scoth
   dam-sa a carput dá roth.
3. At-chī Bran
   līn tonn tibri tar muir n-glan.
   At-chīu ca-dēin i m-Magh Mon
   sgotha cennderga gin on.
4. Taithnit gabra lir a sam
   sella roiscc ro sire Bran.
   Brunditt sscotha sruaim do mil
   a crīch Manannāin mic Lir.
 p.94
5. Lí na fairge fora taí,
   geldod mora imme-roī:
   ra sert buidhe & glas;
   is talam nād ēcomrass.
6. Lingit īch bricc ass de brū,
   a muir finn forn-aiccisiu;
   it lāoig it ūain co n-dath, .i. it lāoi & it ūain na bratāna at-chī Bran
   co cairde, cin imarbad.
7. Cē at-chetha āonchairpteach
   i m-Mag Meall co n-immat scoth,
   fil mōr di echaib ar brū,
   cen suide, nāt aiccisiu..i. boī mōr dírimi ina farrad ocus nī faca Bran
8. Mētt in maigi, līon int slōig,
   taitnit līga co n-glanbōaid;
   finnruth airgit, drepa ōir,
   tāircet foīlti cech imrōild.
9. Cluithi n-aīmin n-inmeldag
   aigdit fri fin nimborbad,
   fir is mnā mīne, fo doss,
   cen peaccad, cen immorbus.
10. Is īarr m-barr fedha ro-snā
    do churchān tar innrada;
    fil fid fo mes i m-bī gnōe
    foa bruinne do bhecnāoi.
11. Fid co m-blāth & torad
    for m-bīd fīne fīrbolad,
    fid cen erchra, cen esspath,
    fors fil duille co n-ōrdath.
12. Fil dūn ō thossuch dūili,
    ce aīss, cin orphthi n-ūire;
    nī fescam dembethangus;
    nīn-tāraill int immorbus.
 p.96
13. Olcc līth do-luith ind nathir
    cosind athir dīa chathair;
    saībse, ceni, i mm-bith chē
    co m-bu h-aithbe nād bhue.
14. Ron-ort h-i crōess & saint
    tresa n-derbaid a h-sāoerchlaoind;
    ethaiss, corp crīn, crō pēne,
    ocus bithaittrev rége.
15. Is recht ūabair in bith chē
    creidem dūile,.i. adradh īdal dermat Dē,
    troīthad n-galar & aīss,
    aptha anma trīa thogaīs.
16. Tiucfa tessorcan .i. Críst h-ūasal
    h-ōnd Rīg do-rea-rōssat;
    recht find fu-glōisfe muire;
    sech bidh Dīa bid duine.
17. In dealb í no fethe-su
    ro-hicfa it lethi-su;
    arrum-thā echtra dīa tigh
    cosin mnāoi i l-Linimhaig. .i. coimpert Mongāin
18. Sech is Manannān mac Lir
    asin charput cruth in fir,
    bied dīa chlaind densa n-gair
    fer cāoin hi curp crīad adgil. .i. MongánMoggān
19. Con-lee Manannān mac Lir
    lūth lighe la Cāointigirn:
    gērthair dīa mac i m-bith gnō;
    ad-ndidma Fīachna mac n-dō.
20. Moídfid sognāis gach sīdhe;
    bid treitil cach daghthīre;
    at-fíi rūna (rith ecne)
    isin m-bith can a ecli.
 p.98
21. Bieid hi fethol cech mīl
    itir glasmuir & tīr;
    bid drauc re m-buidnib hi froiss;
    bid cú allaid cech indroiss.
22. Bid dam co m-bennuiph argait
    h-i mruig i nd-agthar carpait;
    bid écni brec i l-linn lāin;
    bid rōn, bid eala fionnbán.
23. Biaid tre bitha sīora .i. post mortem
    cēt m-blīadna hi findrīghe;
    silis tearca (lecht imchīan); .i. amra infoircnedeg .i. in futuro .i. in corpore.
    dergfaid (?) roī roth imrīan.
24. Im rīga la fēinnid
    bid lāth gaile fri aichni;
    ininnach m-brogha foraa
    fo-chicher airchend ailli. .i. proprium Iloch
25. Art aru-ngēn la flaithe;
    gēbthair fo mac n-imragne;
    sech bid Moininnān mac Lir
    a athair, a fithigir.
26. Bied bess n-gairit a ree in corpore
    coīcuit m-blēdna i m-bith chee;
    oircthi ail dracoin din muir .i. isī agid Mongāin cloch asin tadbaill ro lāad doa.
    h-isin nīth h-i Senlabair. .i. dūn.
27. Timgēra dig a l-Log Lāu .i. post mortem
    in tan frisseill sidan crāu;
    gēbtha in drong finn fau ruth nēal
    do nāssad nāt etarlēn.
 p.100
28. Fossad air sin imraad Bran;
    nī cīan co Tīr ina m-Ban;
    Emna co n-ildath fēile
    riccfa re fuined n-grēine.

@incollection{G400039,
  editor 	 = {Gerard Murphy},
  title 	 = {Manannán, God of the Sea, Describes his Kingdom to Bran and Predicts the Birth of Mongán},
  booktitle 	 = {Early Irish lyrics, eighth to twelfth century},
  editor 	 = {Gerard Murphy},
  address 	 = {Oxford},
  publisher 	 = {Clarendon Press},
  date 	 = {1956},
  pages 	 = {92–100}
}
 G400039.bib