Goffraidh Ó Cléirigh

Edited by Kuno Meyer

Das Leben ein Darlehen

 p.234

Das Leben ein Darlehen

 114

Goffraidh ō Clērig cecinit.

Dligid īasacht
a idlacud re atarba,
nī hē as inraic
intē nach innlaic a acarrda.

Īasacht tucus
is'tig-sea tūas 'gar ̇ndidlucud
nī bīa fa būaid
mina rīa ūaim a idlucud.

Nā mellad sind
in soithech ēdlūith omall-sa,
ramach fa rīr!
is dabach crīn in caland-sa.

In coland crīad
corrach diumsach in drochesa,
aṅfand a tāeb,
tabram dar sāer in soitheach-sa.

Dēna agud,
a ingen dīchra dobuidech,
nā hīarr orum
da rīar, a c[h]oland comaidech!

Tu-su ad c[h]ollād
gan c[h]omrād Dē 'nar ndīanrēim-ni,
is damna deōr
labra donn eōn gun ¹ īarmēirgi.

Cnūasach peccad
mo pend scrībtha ar mo scoladh, ²
cill gach re corp
darm c[h]urach thuind, olc oiriclūn.

Dēor tromthoirsi
co tī tar abra ar n-aigthi-ni,
bid subach sind
ma dubach ind ōn aithrigi.

Co rob clog trāth
in tenga-sa nach tulmaithmech,
gid gēr gailbech
curu bēl ainmnech urnaigthech.

Lossa a lot Crīst
gu cuirem asar crodtigib,
mac seng dar siair,
conmeam 'nar liaig da loitidib.

A meth n-uthruis
nāra horm rabh na rolla-sum,
co ndech mo dērc
is'tech a crēcht a c[h]olla-sun.

Cindus rac[h]ad
'sa Rōimh re snechta sīndeōrach?
mellaid in tsraid
gel grīanānach fer frīmeōlach. ³

Tempull solma
co slecht[h]ar and gu hoirichlech,
cloch gan gnē ngairb
co rob hē m'ainm a hoilithrech.

Tocht 'sa tīr nāeim
nem uadai sair da bindgeibim,
mairg fa mbīa brōg!
as Dīa ar gach ̇fōd da n-imdigem.

Raeileag Muiri
muir Torrian tonn dar ngarbmac-ni,
as ceall gach cūan,
fearr inā gach ūag adlaicthi.

 p.235

Sreab Īsu is Eōin,
a huisce co tī tarum-sa,
sruth cithmer cas
co nigther as in t-anam-sa.

Go tī a purt bhfind
na hēg bethad rim rōtbruithean,
gan teacht dom t[h]oig
mo lecht co rab tair tōcbuigther.

Marcach na tond
na tabrad duini ar dērcairdi,
Dīa ar muin mhara
etir muir tana as tēchṫfairgi.

Marcach na ndūl
danī commus dar comsidib,
ge torchair trīnd
dorc[h]aid in sīn a ssoillsigid.

Ingnad tesgas
cathrach ara mbī a breat[h]aga,
nach taraigh tra
adaigh is lā co letḣfada.

Toirt[h]igi in lā
ō nab lēir feadha as findlinti,
comad adaigh
tīar fa aghaid na firmindti.

Locha as aibni
da ndāil roidh tuc na tēc[h]tandaib,
cūanda ad-cīthir
stūaga in rīgthig fa rēlltandaib.

Luibi cach sīl
sīlas ar gach slicht guidheasun
drūis oirc[h]es and
toirrc[h]es isa crand cuireasun.

Ōn uili scoil
scrības lebar gan loc[h]teagur,
as clēith cindta
nī rēid a firta d'̇foircedul.

Gan gāeith re crand,
gan cith snechta is ē ac talmugud,
fa cuirr cairrgi
gan tuind d'fairgi acht 'ga admolad.

Ad-chī ar th'agaidh
cach āen da rac[h]a a drūndebaidh,
ad-chī ar da c[h]ūl,
a Rī na ndūl, a dūilemain!

Doirb da trēgan,
a-tāi in gach aird co hilerrda,
ge tū ag trīall sair,
tū tīar gom t[h]aig, a Thigerna!

Tu-su as ar cind,
a crāeib da gein ō glan-Muiri,
tū ag folang fōin,
a uball ōir ar n-abla-ni.

I-tā tū tūaid
ōs treib iffeirnn nac[h] airdigi,
a-tā tū teas,
ā c[h]nū da meas na Ma[i]gdini!

Ge fūarais ūaind
onōir dalta sāeir soinemail,
fa rīr! rab olc
ar ndīl ort arnat' oilemain.

Cūig ālaid ort,
a Īsu, a ̇fir na mīndelba,
maith cruth da c[h]nead,
as tū braich na flead fīnemna.

Ar n-uilc rē n-ēg
admum do Dīa ō dagc[h]raidib,
nī tra tagra
ar mbrath ig agra ar n-at[h]dligid.
Dligid. ia.

@article{G400082,
  editor 	 = {Kuno Meyer},
  title 	 = {Neue Mitteilungen aus irischen Handschriften: Das Leben ein Darlehen [Dligid íasacht a idlacud re atarba]},
  journal 	 = {Archiv für Celtische Lexikographie},
  number 	 = {3},
  number 	 = {1},
  address 	 = {Halle a. d. Saale},
  publisher 	 = {Max Niemeyer},
  date 	 = {1907},
  note 	 = {215–246: 234–235}
}
 G400082.bib