Maelmhuire Ó Lennáin

Edited by Kuno Meyer

Der Mensch ist Kot

 p.238

Der Mensch ist Kot

Māelmaire ō Lennāin cecinit.

Pecthach ar sīl 'nar slūagaib,
crāet adbar bar n-anūabair ?
dorinned tre drūis ind d'̇fuil,
dar linn robo cūis c[h]rābuid.

Adaltrus fer na cruinde,
nī hī cland na coluime,
cland fa deōid do dēnam dī
ar fēgad inn eōin eli.

Nī hē sīl in maigri maill
āsas a hiuchra ālaind,
tuccad toirrchius don duini,
roba toirrchius turtairi.

Olc dūthchus na colla crīad,
a dath fallsa nī fīrnīam,
is bec in glōir bud dū dī,
fōill in trū ocus a t[h]reissi.

In corp da lār is lāthach,
nī fōt drūchtach dondscāthach,
nī subh crāeb corp in duini,
nī gort i mbrāen mbelltaini.

Nī hairget ocus nī hōr
blāth na colla re cadōdh,
ar colla ach! gid bailc i bus,
is pairti donda a ndūthchus.

Nī cnū ocus nī dercu dond,
nī hāirni ocus nī huball,
nocho slat bungel barrglan,
acht fullrad ar firadbar.

Nī mil 's nī lemnacht, dar lind,
nī fīnemain da fuilim,
acht bainne fola dāer dub,
nocho crāeb ola m'adbur.

Adbur gach āeṅfir ūainni
nī cuilēn find fīrchūaini,
nī mess crāibe buide a bus,
dāer in duine da dūthchus.

Nī grāinne cruithnechta cāem,
acht bratān fola fīrdāer,
nī crand dond ̇fīnemain find
fīreba[i]r inam (?) a iffrind.

Colla cāema na cruinde
nī fiū arna n-ēg āenuinge,
nī mōidi is sāer āeṅfer and,
gid glēgel cāem a c[h]olann.

Lūach ar molad in c[h]uirp c[h]rīad,
a C[h]oimdi, is mōr in mīchīall,
in corp da lār ic lobud,
is dān olc a admolad.

'Tāi ac nīamad da nāmad fēin,
ēissiun 'got aimles andsein,
olc do chīall, a duini doill,
in scīam cuiri 'mat c[h]olaind.

In corp crīad nī crand toraid,
tech iffirnd a innsamail,
do gach bīud maith do-nī neim
a c[h]ur isin clī caithmig.

Is ē do lennān, dar lem,
in sāegul-sa ata i[t] timchell,
tucais don [̇f]oscud fallsa
dot c[h]oscur a colann-sa.

Gid hālaind in t-airget gel,
is otrach ule a deired,
mellaid mōr duini asa dath,
gid buidi in t-ōr, is otrach.

 p.239

Brec a māini 's a medha,
brēc a ōr 's a arrada,
gach ní is ferr delb ar doman
is derb lium a lothrochud.

Brēc a bleideda bāna,
brēc a cuirnd 's a copāna,
nī fuil acht brēc uli and,
crāet in duine nach dēchann?

Is mairg cuirit sein fo sech
briathra millsi na meirdrech,
cach corp cāem is gach [gnē] glan
ūaind leisin dāel fo dered.

Gaisti dīles in demain
mairg dēchas a dūilemain,
doberr guin crūaid im c[h]raidi
grūaid a-muig na meirdrigi.

Brēc gach sūil gorṁfabrach glas,
fallsa fōs gach folt findchas,
cach aiged derg, cach dēt bān,
cid celg, ōn ēc nī himslān.

Cach slis seng, cach slīasat gel
bid engach dub fo deired,
beid cassa is lāma loma
grānna glassa glētholla.

Trūag nach cuimnech lem' c[h]raidi
in t-ēc ar a ūathmairi,
grāin cach āeṅfir iarna ēc
cēilligh bu cōir da comēt.

Mar do beith sib beō co brāth,
a lucht caithes in conāch,
falchaid mēt bar muirni a-muig
cen chuimni fon ēc acuib.

Is cinti do cach uli
a n-ēc cusan āenduini,
nī fuicfea in t-ēc dūal in ̇fir
nac[h]ar ̇fēt in n-ūag d'̇faicsin.

Is ē in t-iffernd in t-ēg mōr
ar mbī in t-anam ar anōdh,
in t-ēg is ēg uli and,
crāet in duini nach dēchand?

Da mbē in corp athach 'san ūaig,
ad-fēchsam is feidm fīr-chrūaid,
in lān pēistedh, in cath crum,
ach! is dēisten a ndūscud.

Meni beith ceist iffirn and
acht do c[h]āemna na coland,
is mairg do-nī olc 'ma ēg
ar tī na corp da comēt.

Trēn tairnic i-tā 'gar meath
in corp cotultach crāesach,
corp com[u]ichech na clīacha,
olc dobuidech dorīartha.

Pēist do p[h]īastaib in mara
don anmain is escara,
beirid port Dē ōn duini,
in corp is ē in sūgmairi.

Grānna in torad tic a-mach
asin colaind re cnūasach,
meisti soillsi a huilc falaidh
doirrsi in c[h]uirp 'na camradaib.

Meisti in corp do thūar co trom,
is ē a allus a fochand,
mairg ara trēn in corp crum,
is gort gan ̇fer, cen arbur.

Nī tic tar clūassaib in chuirp
acht sal grānna rūad rogoirt,
torud na sūl is na srōn
re tūr is rabud romōr.

Itā mo chorp 'na c[h]amra,
cid ūaibrech as m'urlabra
a Dē, da gēbainn fan glōr,
da fēgainn mē as mo medōn.

 p.240

Is mairg trēiges tech nime
ar in colainn cuitbide,
bec in lūach ar tocht is tech
fūath mara corp do c[h]uibrech.

Mar lān mara a-mach 's a-muig
bid brū cach āeṅfir amlaid,
do-cair, is cinti in dān dī,
in lān inti ocus eisti.

Menba sāit[h]ech, nī subach
in corp ītmar acarach,
torud inn airg in grān glan,
mairg do-nī lān don lestar!

Mairg danab āil dimblaid oirnd
ma dulas in drochcolaind,
in clār do hegrad da thūr,
in corp pecthach mar prisūn.

Adbur in chuirp, a chara,
nocho lega lōgmara,
nī tech slaitgel corp in c[h]uil,
olc a aitreb, cid inmain.

Ingnad ecla ar inn anmain
ma dulas in drochadbaid,
cid da geib sē in corp cādus,
is olc, a Dē, in dūnārus.

Mairg dar tigerna in corp crīad,
roba ferr dūind a dorīar,
ge da olc oirni ¹
nī hē in corp a comairchi.

Re mac ingene Anna
ūaigem uli ar n-anmanna,
co cenglum ar cīall's ar cond
risin Rīg sēgaind sengdond.

Co fag[b]um sīth mic Muire,
co rīsium 'na rīgchuiri,
co cenglum ar corp 'sin c[h]ath,
go ndedlum re port pecthach.
P.

@article{G400084,
  editor 	 = {Kuno Meyer},
  title 	 = {Neue Mitteilungen aus irischen Handschriften: Der Mensch ist Kot [Pecthach ar síl 'nar slúagaib]},
  journal 	 = {Archiv für Celtische Lexikographie},
  number 	 = {3},
  number 	 = {1},
  address 	 = {Halle a. d. Saale},
  publisher 	 = {Max Niemeyer},
  date 	 = {1907},
  note 	 = {215–246: 238–240}
}
 G400084.bib