Unknown author

Edited by Kuno Meyer

Anrufung der Dreieinigkeit

 66a p.241

Anrufung der Dreieinigkeit

Dēna mo theagosc, a Thrīnōit,
a Thigerna ar tigi n-ōil,
ling ar mo theangaid, a Thrīnōit,
beandaig ind dot mīndōit mōir!

Ar do thrīnōiteacht, a Thrīnōit,
tar dom leiges, labair rium!
atā bile dercnach darach
craide pecthach salach sund.

Gidh olc mē, nīr' millius dāenna,
nī dernus meirle, a maic Dē!
mō lām nochor' leadair duine,
freagair ar grād Muire mē!

Massa slicht fīre ara b[f]uilim,
fathraichther mē, nī mōid lind,
massar brēic a-tām, a Thrīnōit,
lēic ar lār in ̇fīr[̇f]ōit ind!

Nā lēig in n-anmain-sea i n-iffernd
a n-onōir Muire, a maic Dē,
lēic dot mātha[i]r in [m]bocht brāthar,
olc in brāthair māthar mē.

 p.242

Nī cōir crē nā talam thorum,
acht tond brātha, beg in ̇ferg,
nī cōir nī eli dom ̇falach,
a Rī, acht teni darach derg.

Do delbais in t-āeb sa, a Thrīnōit,
do thalmain 's do theinid bī,
duine do thenid 's do thalmain
fuine deiġfir amlaid hī.

Uchan, uch! gid olc bar credem,
a chland Ādaim in ̇fuilt chlāin,
do tholl lāeg for sethar sæiri
leathar sāer, a dāini, d[ā]ib.

Deoch don uisgi d'̇fir dot muintir,
a maic Dē, nī dūthracht lind,
is mōr in grād duit ar duini
nach sluic in lār uili ind.

Atā colum uchtgel ālaind
againd a-muig, mōidi ar ngnāi,
atā ūan find ic ar fognum,
dūan limm do lomrud cach lāi.

Atā scīath corcra 'gar comēt,
in call ūaini ē, nī dair,
inmain lium in scīath nach scailtenn,
trīath cen chenn, cen ̇foirceann fair.

Atā toirrchius ūasal ālaind,
is ingantu mar' īad brū,
ēicni nach bī err 'na adrad,
mo-cheand, a Rī in talman tū!

Comartha ort seach cach n-āeṅfer
d'̇fini Abrām, āebda in fer,
āenslat do bī d'̇fini abrān
'na bili trī ngablān ngeal.

Do delb dūileman do dūilib,
do delb ōclāech inmain lind,
do delb cēsta, scīam do scīamaib,
grīan is ēsca t'̇fīadain ind.

Idan tāncais-siu ar talmain
mar tic blāth tar brūachaib dīc,
mar tic oigred re tāeb tuili,
sāer dorigned duini dīt.

Ōg do-bruinned is do-baisted,
blāith ro-gabais cucut corp,
ōg ro-bruinned tū i mbroinn Muire,
nīr thoill broinded eli ort.

Tond baisteda ar do bois nglengloin,
glegan rom-ī do rosc mall
usce ar do chēib, uch! rob ingnad
in sruth sēim ro hindlad and.

Da-bī in t-ōr buidi arna bruinded
a mbroinn Muire maith rothoill,
ō tūg ōgh na manach Muiri
falach d'ōr buidi 'na broinn.

A ge[i]n, ro-bī tū a mbroinn Muiri,
a maic Dē nach derna olc,
a chind na glōiri is na gloini,
nīr mill Muiri a hōigi ort.

 p.243

Do chind pecthach mengach meblach,
mōr in gābud, guin do t[h]āeib,
is dolig limm, a maic Muire,
do chreic do chinn duini dāeir.

Tucais-siu agaid ar iffernd
dis da cloinni ¹, a chūl na rōt,
comrac dā ball rīg sa rathaig
in cland crīn 's an t-athair ōc.

Da-bī inn aidchi sin ag ainglib
agaid ālaind abra duib,
rānic co slūag nāemda nimi
ūan cāerach gili 'arna guin.

Tucsat esbaid āenmac ālaind
ort, a Dē do-delb gach rīg,
sēda in cass is trom in trilis,
corr in bass do-dligis dīnd.

Ag seo in glac-sa an guin do glaicci,
a maic Dē, mar dlegar dīt,
toll at bond, a bēl mo chraidi,
do-bēr bond eli na hīcc.

Ro-ba crithar toll 'gar termond
do thāeb glēgel, do glac soirb,
gāiri is do chorp 'arna chriathrad
gan nāiri innocht iarthar oirnd.

Ac seo cucut coland merlig,
a maic Muire, co mbē ar boil,
ac seo cim[b]idh co ceird nathrach,
im[b]ir-siu t'̇feirg athach fair!

Seōl bic romaind'sa rōt cētna,
a choss trūag-sa trēig do bū,
a choss, rom-seōla 'sā sligid,
eōlc[h]a anois go tibir thū.

Trēicfet uli fir in betha
ar in dūilem ro-delb grēin,
ro-gerr lium torud in tīre,
ferr ar ndomun fīre fēin.

In greim tarrtha dīt nī dīsleoch,
a dia in mi do nī ar clū,
bid greim fir is beith 'ga bāthud
do dreich gil ō thartha thū.

A delb āeṅfir, a delb dēise,
beir-si oraind-ni breith mbuic,
a delb na trī n-āen, a hāenalt,
co tī tāem dot dāenacht duit.

Co ndernur aithrigi is fedbdacht
is oilithri, cid olc mē,
co lēiciur sīliud dom sūilib
ac sīriud ar dūilib Dē.
D.

@article{G400086,
  editor 	 = {Kuno Meyer},
  title 	 = {Neue Mitteilungen aus irischen Handschriften: Anrufung der Dreieinigkeit [Déna mo theagosc, a Thrínóit]},
  journal 	 = {Archiv für Celtische Lexikographie},
  number 	 = {3},
  number 	 = {1},
  address 	 = {Halle a. d. Saale},
  publisher 	 = {Max Niemeyer},
  date 	 = {1907},
  note 	 = {215–246: 241–243}
}
 G400086.bib