Unknown author

Edited by Kuno Meyer

Die heilige Jungfrau

 66a p.244

Die heilige Jungfrau

Gilla Bri[g]di cecinit.

Fuigeall beandacht brū Muiri,
eochair ra fōir sochaidhi,
glas gach duine da-bī a mbroit,
is ī uile da oslaic.

Nī thabair gilla ar a gart
tūar mar thorad na mbennacht,
nocho leagh in torad tig
neam ocus talam tremit.

Scēl lem al-lus na mbennacht
fȧfūair Muiri mōrchendacht,
nī cuir sind ar inn ēn ōir
acht scēl bus bind don bhanōig.

Lā da Iacim d'athair Muire
le hāenboin da hāengaire,
da-cī nāenmur go nēim ngloin
'sa mbrāenmagh rēid da rochtain.

R[e]ic a bhō d'̇fis a echta
da cuindig in cuidechta,
lesc le fer a mallbō a-mach
isin tsamlō geal grīanach.

Gabas ūaithib gach feidm dō
cennach da cind a āenbō,
nocor cean[n]ach nār gab greim
damhar in t-eallach d'Iacim.

A nāe mbennachta ar in bhoin
tucsat dō a n-ucht a ēdaig,
bennacht in nāenmair ōgh find
robo lōr d'āenboin Iacim.

Ïadais a ucht umpu sin,
tēid 's a ben leō 'sa leabaid,
bentar ria 'sa leabaid leis
mar da c[h]edaig Dīa in deiġfeis.

Tecmaid and sin, sūairc in greim,
Muire mōr do mnāi Iacim,
deaghachain hē rob ē in fear
seanathair Dē fa deredh.

Dīa tresin mbennachtain mbind
grādaigis ingen Iacim,
suirgi ris da-roinne sī,
as nīr bris a hōigi in t-Ardrī.

Gabais Gabriēl 'ga guidi
ōn athair co hōgh-Muiri,
tic sanais da Muiri mhōir,
gabais 'na craidi a cēdōir.

Cor torrach Muire mātha[i]r
co hidan don urrlātha[i]r,
Gabrial re bruindi nīr ben
nirb anliadh uirri in t-aingel.

Trī rāithi a medōn Mhuiri
gein sochair na sochaidi,
in t-āengein da bī fa broind
'na trī hæiblib ra ursaing.

Rug in uaisg mhīngel Muiri
ūan corcra a crū asaine,
inad ūar dotla nīr dligh
's a hūan corcra 'man cæirigh.

Rucad isin Bethil buig
Ardrī nime fa notlaig,
thuc rith a grēin mar do gein,
cor tēigh in bith da bruithin.

Oslaigid re hucht in sgeōil
fuindeōga ēsca as æōir,
cor lāi in grīan a doirsi di
dlæi ar a soillsi rīam ro[i]me.

 p.245

In t-ëur lān da loisi,
rob urusa a urmaisi,
ōs cind nāem-Muiri co neam
'na āendhoiri findaingel.

Na fāidi, faillsigther dōib
Airdrī in betha 'gun banōig,
coindel ōs cind a hochta,
loinder find na hōghdachta.

Tūis dō ar a dīadacht, dāil glan,
ōr ar a rīg[d]acht rugad,
a lind, nocho trāig re tart,
mirr 'na dail ar a dāenacht.

Indistir d'Irūath and sin
co rug ben isa Bethil,
in t-eō sēnta cas corcra
dar' las rēllta rīgdachta.

Cuiris a t[h]eglach da thūr
tre formad is tre imthnūth,
d'īarraid Dē, gin gur' dotla,
sē a ndīamhair na dīadachta.

Marbt[h]ar gach mac, mōr in gnīm,
da raibi a n-æis in Airdrīgh;
da marbad Dē, gin cor' dlig,
rob ē adbar in o[i]rligh.

Da bātar lā a lurg Muiri
muinter Irūaith iulaidhi,
tarla a nglind a grūad corcra
le hūan find ar folachta.

Tarrla Grigair ar in nglend,
dalta Irūa[i]th na n-ōrbend,
adcī in stūag ceandglan corcra
ūad delrad na dīadachta.

Tuc Grigair grād a anma
don nāeidin ōig oscurda,
cro Grigair gan rath na r[e]abh
da minaigh cath 'ga chosnamh.

Cēt-Grigair dacūaid 'se Rōimh,
is ē, mas fīr don c[h]anōin,
Grigair 'sa Rōim re seal sin,
fer inaid Pōil is Peadair.

'Ga īarraid ar muin Muiri
darindi in mac mirbuili,
a tāeb fīrtbhān fa ferta
'na mīngrān cāemh cruithnechta.

In[n]isid, is ē 'ga ar,
fer a faicsin tre adh[ ],
in lā sin tre lorg a mbond
fāsaig a colg 's a colond.

Tic in ūair sin tresin n-ar
muinter Irūa[i]th na n-adrad,
ger prap sain da bās 'ga būain
ar fās in air re hāenūair.

Tāinic lā a-muigh da Muiri
mīan meassa in chraind chumraidi,
a barr cor' lomair da lāim,
cromaid in crand 'na comdāil.

In ūair da c[h]aith Īsa caill
a lōr da meas in mōrchraind,
mar da cham don mīngil mhōir,
dīrgid in crand a cēdōir.

Dīrgead misi māthair Dē,
inand ar fuil 's ar feōilchrē,
in cræib find, in ēitni ōir,
lēigt[h]i sind sāer 'na honōir.

Grāin lium do loscud m'anma,
m'aeibli loma lasamhna,
mē ocus teine ar mo thengaid,
sele Dē re dreithleandaib.

 p.246

Sēidead na dreithleanna dīnd
in bēl ro-bīath in t-Airdrīgh,
in druim ara ndechaid muin
dom-buing ō dethaig dīabuil!

In cīch da cuired 'na bēl
[e]adrum is iffearnd armgēr,
da geb connailbe Dē de
mē ar comairge na cīche!

[E]adrum as allt na crōne ¹
co mbē mac na mōrōighe!
cnū beō mogail ar muini,
eō tobair na trōcairi.

Dabach glanta gach gilli,
fothrugud na fīrindi,
geal asa dabaig gach dream
na samail flead re fuigeall.
Fuigell.

@article{G400087,
  editor 	 = {Kuno Meyer},
  title 	 = {Neue Mitteilungen aus irischen Handschriften: Die heilige Jungfrau [Fuigeall beandacht brú Muiri]},
  journal 	 = {Archiv für Celtische Lexikographie},
  number 	 = {3},
  number 	 = {1},
  address 	 = {Halle a. d. Saale},
  publisher 	 = {Max Niemeyer},
  date 	 = {1907},
  note 	 = {215–246: 244–246}
}
 G400087.bib