Seithfín Mór

 p.154

Bríathra cogaidh con chath Laighnech

Seithfín Mór cct.

1. Bríathra cogaidh con chath Laighnech,
   cath lé ngorthoir gallchloch,
   atá tríall ar nach téid toirmesc
   con fhéin ó íath Almhan.
   Tic in damhraidsi dá nderbadh
   gallbailti gan ghalldacht.
   Is gerr inn aga gan imthecht
   a cenn chatha in Calbach.
   Ar scibadh greg suaichnidh sibhlach
   gluaisit gusin ngallchath,
   ar scibadh a lúirech loindrech,
   a crúisiuch 'se carbad,
   'sa sciath n-asnach do chlecht comrac,
   'sa scabal mbrec mballghlas,
   ar ngormadh clogat corr coinnlech,
   'sar clochadh colg raghlas,
   sibal con tshlógh fhíchmar Fhailghech. p.155
   ar límadh bróg mbarrlag.
   Tógbhaid anocht ortha ac imthecht
   cor gortha don ghalldacht.
   Coinne in tshlúaighsi gá tá a tennguth
   a Ráth Gúaire gabthur.
   Áth Truimm ar dheóradhuib dergas
   beóghasraidh fhuind Alman,
   co leiget sein gaeith tre ghalltor,
   láeich a leith a farchadh.
   Sibal dána ón oirecht Fhailghech,
   Droiched Átha d'adhnadh;
   co hÁth Cliath, ní cúairt can chennseal.
   do-sía cúairt ón Chalbhach.
   Cin agon lethanchath Laighnech
   a Cethurlach carntar.
   Co Cill Coinnigh nochar chromsat,
   in toisg-sin is tarbach.
   Hí Fhailghi, is dá n-eiri ac immthecht
   aighne is greidle gallchloch;
   is imdha ón Fhailghech ar immchur
   gaillcherc agus ganndal.
   Sreth cabún ac techt 'na theghlach,
   sreth bagún is brannrad.
   A n-eiri ón echtra-sin Fhailghech
   ar echlachuibh d'adhbras.
   Géill fa shíthlaibh óir gá n-imchur
   ac rígraidh fhóid Alman.
   Fine Chonchubair a comruc
   comlasaid fan Chalbhach.
   Soighde lethna ón ágh ar imchur,
   slegha ar áth mar aradh.
   Anait súd ar losgadh longphort
   re goradh chúl calbthad.
   Ceilter a áladh con Fhailghech
   bántor noco mbarrlass.
   Do dherg Caisel do dherg Durlus_
   aister is fherr anfadh.
   Do-béra fóss lá do Luimnech,
   in tráth bus mó in margadh. p.156
   Cill Dara gá lá nach lingfedh?
   Nás aga do hadhnadh.
   Atá tuilledh is ar thuirmes,
   cuirther ar an Calbach.
   Mac meic Muirchertaigh, bos barrghel,
   rosg muinntremail mallghlas,
   aithris con macsain ar Murchadh,
   do fhalaigh gach annsmacht.
   A gemhel ghlúinech ghlas ghailbech
   ac snas chúiledh calpthadh.
   Fer lé cumthar cís ar coblach,
   dá tundtar fín Frangcach.
   Scíath brec ina aici ar imchur,
   fer scailti scíath n-amlach.
   Fer do grís an t-áth gá imthecht,
   lámh re sním na samhthach,
   fer sleighi go dorn do dergadh,
   tonn is treisi anfadh.
   Fer le linged brugh a bidhbad,
   dá tug inghen annsacht;
   derc ar éndath is [in] t-ogradh,
   fer lé mbrécthur banntracht.
   Mac Gormlaithi, nár fhaem ainchert.
   fraech borbthuinde balbus.
   Do cuiredh súas don fhód Ultach
   lé glór cúach ón Chalbhach.
   Faemthar don bosfhada bronntach
   Connachta fa chrandchur.
   Do coisged leis medhair Muimnech,
   freagraid sein in samhrad.
   Is deredh d'ossadh na n-Ulltach:
   in codladh don Chalbach?
   In codladh don Chalbhach?
   Clú Mairgréd ar cor a caemna,
   failmgég nach blodh bríathra,
   ben nár chuir eól ar an éra,
   cnú beó d'fhuil na n-íarla;
   cíab gégach dan hoide Íssa,
   croidhe dércach díadha;
   ar ól fledh nír thréig a trátha, p.157
   ben do réir a ríaghla;
   atá sí ar an ceird gá caemna,
   is leind bíd a bríathra.
   Bríathra .c.

@incollection{G402239,
  editor 	 = {Osborn Bergin},
  title 	 = {Bríathra cogaidh con chath Laighnech},
  booktitle 	 = {Irish Bardic Poetry},
  editor 	 = {Osborn Bergin},
  address 	 = {Dublin},
  publisher 	 = {Dublin Institute for Advanced Studies},
  date 	 = {1970},
  pages 	 = {154–157}
}
 G402239.bib