Unknown author

Edited by Winifred Wulff

Two medical fragments

1. A

RIA MS 23 P 20, p. 17a, l. 32.

Fiarfaigter in ona cosmailius no ona contrardha is cora na seandaine d' oilemain, derbtur curub on cosmailius, oir adeir Galienus co ndlighenn in áois ⁊ in coimplex d' fhollamhnugad co brach ona cosmailius ⁊ derbuidh se do reir ugdurais Ipocraid noch co ndleghtur na neithi nadurdha d' fhollamnugad ona cosmailius ⁊ is nadurdha in áois, masead is ona cosmailius is cora na sendaine d' oilemain; ⁊ adeir Galienus gurub ona cosmailius is coir na daine slana d' oilemain, ⁊ is slan na sendaine, masead is ona cosmalius is coir i n-oilemain, ⁊ derbtur do reir Galienus noch adeir mar so .i. is and adermuid nech do beith eslan an trath teit se tara naduir fein, ⁊ ni teit an senoir tara naduir fein .i. tar an naduir ina du do do reir a aoisi, masead docitur gurub slan iad, oir ata radurc ⁊ eistacht ⁊ gach ni ele is dú do do reir a aois, masead fagtur gurub trina cosmailius is du na sendaine d'oilemain. Et ata Galienus ina aiged sin mar a n-abuir se co ndleghtur gach uile ní ainmesurda do breith cum mesurdachta an ni ainmesurda ⁊ atait na senoire ainmesurda fuar tirim, ⁊ te ⁊ fliuch is contrarda don beathaid is coir d' fhollamnugad, ⁊ fedtur an resun so do daingniugad mar so, oir is slighe comlinga an t-sendacht ⁊ te ⁊ fliuch is tosach don beathaid, masead is iad foghnas and, oiris iad baccus an t-eg  17b ⁊ coimedas in beatha. Adermuid curub fuar tirim na senoire ⁊ gurub bec d' fhuil ⁊ do tes ⁊ do spiriduib ata indtu ⁊ gurub cumung a poire ⁊ gurub anmunn a ndilegad ⁊ is mar [sin] tuicim and so co leir nach slan na senoire c[o h-airidti] oir ní bit coidhchi gan geran ² ⁊ ni h-eslan co h-airidti iad lo do clunit siad ⁊ eistid ⁊ lo ata acu gach cungill is coir doibh , ⁊ o nach slan ⁊ o nach eslan iad, masead is nemnechtarda iad, ⁊ foillsighi Galienus sin, oir adeir se an trath bis eslainti mor [ar nech] ⁊ eirges nech aisti gurub nemnechtarda é, oir is becc d' fhuil ⁊ do spiriduib {⬌} [bis and ⁊ trid sin is cosmaill] iad do reir foillsighthi nemnechtarda an nech eirges a h-eslainti.

[2] Aderim co ndentur an follamnugad reim coimedach trit an contrardacht leth amuith don ceim in uair is ail linn raod do reim coimed[ach] {⬌} nach bia se ní is mesa da mbia se sa 3 ceim {⬌} ⁊ doniter  p.49 in follamnugad coimedach gacha dirga trít an cosmailius, ⁊ mad ail lind ní fuar tirim sa 3 ceim tai[niste] do coiméd neithi fuar tirim isin ceim cedna dleghar a tobairt doib. Et ata follamnugad ailemnach and ⁊ is ris sin aderur follamnugad mesurda ac dul cum tesa ⁊ cum fliche ⁊ is e sin fognus dona dáinibh anmanna eslana ⁊ don lucht bis ar digbail ina tes ⁊ ina spiriduibh.

[3] Et tuic and so ca meid modh a n-abur eslainti uilidhi .i. aderur eslainti uilidhi o uilidecht gabala, ⁊ da reir sin is uilidhi in fiabras ⁊ aderur eslainti uilidhi o uilidecht condmala, ⁊ da reir sin is eslainti [uilidhi] an nescoid ⁊ in t-at, mar ata an t-atcomull ⁊ in potagra, oir aderuid na h-ughduir co connmuid siad gach uili cinel eslainti inntu fein; ⁊ aderur hi o uilidecht gan dechfir, ⁊ is mar sin is eslainti uilidhi an bolgach ⁊ in bruitinech, oir bit siad gan dechfir in gach rand don corp. Et aderur hi o uilidecht brighe, ⁊ da reir sin is uilidhi an t-allus an uair tic do reir faothuighe ⁊ tar eis comartai an dilega .i. in trath bis nert ag an brigh ar adbur na h-eslainti isin corp uili. Et aderur hi o uilidecht truaillighti, da reir sin is uilidhi in lubra. Et aderur hi o uilidecht cuisi ar son gurub bec nach cuis ⁊ nach mathair do gach uilidecht hi, da reir [sin] is uilidhi in rema, oir is cuis do gach eslainti é, ⁊ is eslainti uilidhi an tisis, oir is cuis d'eslainti uilidhi hí [.i. don] ³ eitici. Et aderur hi o uilidecht doniter o moran d'eslaintib ⁊ da ballaib, ⁊ da reir sin is eslainti uilidhi an flux, oir doniter é on gaili ⁊ ona h-aoib ⁊ on incinn ⁊ ona h-indibh ⁊ on[a] ballaib ele nach labhramuid. Et aderur hí o uilidecht gortuighthi, da reir sin is eslainti uilidhi an galur tuitimnnach ⁊ a cosmailius, oir gortuighe se in corp uili ina aixis noc condmas leth an cuirp uili ina aixis isin pairilis ⁊ a pairilis na tengad no an meir no baill rannuighe. Et aderur [hi] o uilidecht oirida, da reir sin is uilidhi eslainti [an croidi mar] ata crith ⁊ anmuinde, ⁊ eslainti an cinn mar ata a teines, ⁊ eslainti na n-ao mar ata tes no  18a a ndunadh, ⁊ eslainti na n-uirgid mar ata in aimridecht. [Et aderur] hi o uilidecht coimcenguil .i. ar son co [ceng]land an ball a mbí sé re ball ele, da reir sin is uilidhi eslainti in gaili mar ata sgethrach ⁊ esba dilega ⁊ [gaoth]muirecht, ⁊ eslainti na n-indid mar ata gaothmuirecht ⁊ colica ⁊ ilica, ⁊ eslainti na n-arunn ⁊ in lesa mar ata cloch, oir is boill coitcinda uilidhi so noch doni serbis don corp uili. Et aderur  p.50 hí o uilidecht toitid , ⁊ tuic da reir sin co fuilid trí gneithi arin crupan .i. [te]atanus mar comtairrngter feithi in droma [⁊ leith]e na h-aighci ⁊ is eigin donti ara mbi sin [beith] ina certsesam. Gne ele de .i. euaptostinus [mar] crapuidhter feithi na h-aighchi amain ⁊ is eigin donti ara mbi sin beith ac fecuin sis do gnath. An 3 gne .i. empetostinus mar crapuidhter feithi in droma amain ⁊ is eigin donti ara mbi sin beith ac fecuin suas do gnath, da reir sin is eslainti uilidhi teatanus mar crapuidhter na feithi do gach leth ac fecuin an leiti ele ⁊ na gneithi ele acht d' aontaoib amain. [Et] aderur eslainti uilidhi .i. eslainti coitcind uilidhi, da reir sin is eslainti uilidhi na cneada ⁊ gach uili creacht.

2. B

RIA MS 23 P20

[1]  23a line 41 [Q]uia dictum est primus quodh duo tractatus primi erunt de morbi[s] uineuersalibus .i. o do labrumar gustrasta ar tus co mbedís in da cedtrachtadh don lebur so dona h-eslaintib  23b uilidhi, da reir sin is coir duin a fis do beith againn ca minca aderur inn eslainti do beith uilidhi, oir aderur hi do beith uilidhi a moran do modhuibh ⁊ ar tus on ni tachmuing in corp co h-uilidhi ⁊ is andsa modh so aderur in fiabras ina eslainti uilidhi amail adubrumar romuinn. Item aderur uilidecht uilidhi continoidech, oir tachmuingid si gach uili cinél galuir, mar atait aitt ⁊ nescoidi ⁊ idropis ⁊ potogra. Item aderur uilidecht neimdechfrech uilidhi na mball co h-uilidhi, mar ata bolgach ⁊ gerba noch ata o uilidecht na mball , oir is neimdechfrech iad in gach rand don corp co h-uilidhi. Item aderur uilidecht na mbrigh risin n-allus in tan fo tic se deis comartha in dilega ina tigernuighid na briga deis comartha in dilega d' innarbad adbuir na h-eslainti.

[2] Modh ele i n-abur uilidhecht uilidhi truaillighthi ⁊ is amlaidh sin ata in lubra ina h-eslainti truaillighthi gun a cuis, oir is cuis ⁊ is adbur don uili eslainti hi ⁊ is mar sin ita in réma ina cuis ⁊ ina adbur dona h-eslaintib co h-uilidhi ⁊ do moran d' eslaintib. ⁊ Ata tisis co uilidhi, oir is uilidhi a h-adbur ⁊ a h-eslainti. Item fetuid uilidecht neimdechfrech techt on gaili ⁊ ona h-aoibh ⁊ ona h-indibh, ⁊ is  p.51 mar sin ita in flux bronn ⁊ fetuid techt on incind mar sin. Item aderur uilidecht uilidhi gortuighe ⁊ is amlaid sin ata epilepsia uilidhi, oir gortuighe si in corp uili ina h-aixis. ⁊ Ata apoplexia ina h-eslainti uilidhi, oir toirmiscid si cuimne ⁊ gluasacht. ⁊ Aderur uilidecht uilidhi na méidi ⁊ is amlaid sin aderur in pairilis do beith uilidhi, oir tachmuingidh si leth in cinn a coitcindi no mer no ball ele rannuighe. ⁊ Aderur eslainti an cinn do beith uilidhi, amail ata a teindes ⁊ Aderur ni ele do beith o uilidecht uilidhi tosanuigh ⁊ is amlaid sin atait eslainti in craidhe uilidhi, mar ata tremor ⁊ singcopis. Aderur eslainti na n-áo do beith uilidhi, mar ata a tes ⁊ i duinti. Aderur [eslainti] na n-indi ⁴ do beith uilidhi, mar ata sdirilitas. ⁊ Aderur uilidecht uilidhi salcuir, mar ata ictericia ⁊ morfea ⁊ h-enteria.

[3] Aderur uilidecht uilidhi boill umcengul, oir cenglaid si maille risna ballaib ele co h-uilidhi, mar ata [eslainti an gaili mar ata] in sgethrach ⁊ neimdilegad no gaothmuirecht no siadumlacht, no eslainti na n-indidh mar ata colica ⁊ illica, ⁊ eslainti na n-arund ⁊ in lesa, mar atait clocha, oir is boill serbisecha don corp co h-uilidhi na boill sin.

[4] Item aderur eslainti aontadach co h-uilidhi re titanus, oir is eslainti uilidhi sin, oir connmuidh in corp co h-uilidhi no in rand uachtarach no in rand ichtarach don corp, ⁊ dechfrigid oipicostina ⁊ oimpicostina, oir tachmuingid epicostina leth in cuil ⁊ empicostina leth na h-aighchi ⁊ tachmuingidh tetanus iad ar aon. Et aderur eslainti uilidhi ele do beith and .i. eslainti coitcind ⁊ idirdeluighter ina n-eslaintib comcosmaile ⁊ oifigacha, ⁊ sgailti na mball ndluith o lothuib ⁊ do crechtuibh, ⁊ atait eslainti ele uilidhi ann aderum isin 3 lebur inar ndiaigh do reir na ndoctuireadh.

@article{G600016,
  editor 	 = {Winifred Wulff},
  title 	 = {Two medical fragments},
  journal 	 = {Irish Texts},
  editor 	 = {J. Fraser and Paul Grosjean and J. G. O'Keeffe},
  address 	 = {London },
  publisher 	 = {Sheed and Ward, 31 Paternoster Row},
  date 	 = {1931},
  number 	 = {1 },
  pages 	 = {47–51}
}
 G600016.bib