Unknown author

Edited by Toirdhealbhach Ó Raithbheartaigh

[1]  Anmand na n-Athachthuath ocus a fodla dia rer Libuir Glinne Da Locha inso.
Aithechthuatha em fodailset fo fodailset fo Erinn iar ndibad a saerchlann ocus a saerfer .i. xlui. do aicmib.
Semrige. Saithrige. Benntraige. Catraige. Crothraig. Brugraide. Scotraig. Lathraige. Carraige. Gabraig. h-Uraige. Mendraige. Teocraige. Rathraighe. Nudhraige. Callraighe. Bondraige. Bladraige. Ludraige. Luffraighe. Condraige. Sedraige. Granraige. Curaig. Glasraige. Bibraige. Boccraige. Corcoige. Corcu Ainge. Corcu Dega. Corcu Maighi. Corcu Muichi. Corcu Solchend. Corcu Bili. Corcu Bruighi. Dal Mo Chon. Dal n-Didail. Dal Mathrach. Dal Maigni. Dal Tidilli. Dal Mo Coirp. Dal Mendato. Dal Mude. Dal Muigid. Dal Murchon. Dal n-Uisquide.

[2]  Aicmeda na n-Athachthuath insin. A tuatha inso. Gaileoin. T. Aithechda. T. Fochmaind. T. Fidga. T. Firbb. T. Brecraige. T. Treiethirni. T. Semonn. T. Mc n-Derbchon. T. Benntraige. T. Mairtine. T. Cairige. T. Bibraigi. T. Senmogad. T. Sen-Erann. T. Fer Morc. T. Geibtine. T. Emenrige. T. Mc n-Umoir. T.Cathbarr. T. Carra. T. Fer Ruidi. T. Fer Ninais. T. Cathraighe. T. Sencheneoil. T. Choncobuirni. T. Mc n-Umoir. T. Resen. T. Humoir. T. Domnann. T. Cruithnech. T. Cregraighe. T. Ochuinne. T. Guaire.  p.108 T. Tarduius. T. Cruithnech. T. Buain. T. Selli. T. Nebluirg. T. Ligmuine. T. Tregae. T. Masraige. T. Airbre. T. Glasraigi. T. Chonnraige. T. Luaigne.

[3]  IS uaidib se ro fas daerchis fognuma for saerclandaib Erenn .i. na feranna dia fognaitis dofallsat na saerclanda uaib ⁊ atroebatarsun ⁊ forbrisetar na saerclanda foraib ⁊ rucsat a ferann uaidib co ro len in doerchis na soerclanda de sein for slicht in feraind ar at soera uili Fir h-Erenn acht in lucht doruirmisem.

[4]  Bai fodord mor icon lucht so .i. ic Athechthuathaib h-Erenn i n-aimsir na tri riag sa ar h-Earinn id est Fiacha Findolaid ⁊ Fec m. Fidfeoccoeich ⁊ Bres m. Firb.
Batar didiu tri aithig robdar toisigh comairle d"Athechthuathaib h-Erenn in inbaidsin .i. Monach ⁊ Buan ⁊ Cairpre Catchend ⁊ ba cenn doib uili Cairpre Catchenn.
Doronsat comairli iarum Aithechthuatha h-Erenn do rer in trir sin.

[5]  Ba si comairli na n-Athech targud fledi dia tigernaib ⁊ a marbadh leo icon fled sin.
Badar iarum na h-athig tri bliadna ic airitin ⁊ ic foichill na fledhi sin, ⁊ trian a toraid cacha bliadna doratsat fria h-aireac. Is and uero dorrigenset i Maigh Acrach la Connachta.
Do-lodar iarum Fir h-Erenn dind fledh sin as cach aird i m-batar. Faidit didiu .ix. nona ic tomalt a fledi ⁊ ni frith homo ¹ nosmairnfed. Do-bretha lenda soineamhla doib imun nomaid combat mesca miciallmair. Ro ortait iarum soerclanda h-Erenn icon fleid sin tria thairised (?) na n-Athech ⁊ tria n-a mesca fodesin, acht sil na tri macc badar i m-brondaib a maithreach in tan sin. Batar carait clemna do tigernaib h-Erenn imun inbaid sin ria Alban ⁊ ria Saxan ⁊ ria Deiscirt Bretan. Ba cara cetamus do Fiachaig Findolaid Luath mac Derera ria Cruithentuaithe. Baine uero ingen Scail riag Fomoiri ben Luaith. Dobreth didiu do Fiachaig  p.110Findolaid, Baine didiu a h-ainm siden fen. Ba si sin maathair Feradaig Find Fechtnaig mc Fiachach Findolaid.
Ba cara didiu Fiacc mac Fidfeccaich ria Muman do Gortniat riag Bretan. Bert a ingen siden .i. Gruibe, mac do Fiacc .i. Corb Aulaim a ainm.
Ba cara didiu Bresal mac Firb ria Ulad do Chaindi Oll riag Saxan. Bert a ingen siden, Aine a h-ainm, mac do Bres mac Firb .i. Tipraide. Tipraide Tirech a ainm.

[6]  Ni tharat in talam a thoradh du na h-Aithechaib iarsin fingail do-ratsat for soerclannaib Erenn ⁊ bai gorta mor la Firu h-Erenn etir inberu ⁊ fedu ⁊ocus ithu ⁊ ocus blechtu.

[7]  Ro fessai iarum tri comarbai h-Erenn do bith in Albain .i. Feradach Find Fechtnach ⁊ Corb Ulom ocus Tipraite Tiarech.
Tiagar iarum uaidhib fora cenn dia righad leo i n-Erinn ⁊ dobertatar ratha nimi ⁊ talman in t-seachtai ⁊ na huili dula friu immoa fognum doib dia rer airet beth muir im h-Erinn.

[8]  Dothogat na maicc la sodain ⁊ gabais cach dib ina rind, Tipraite Tiarech i n-airther h-Erenn i n-Ulltaib, Feradach Find Fechtnach i medoan h-Erenn i Temraig, Corb Aulom a n-descert h-Erenn .i. i m-Mumain. Conid uaidib sin rogenedar tri soer Erenn a frithisi .i. Conn, Eogan, Araide, de quibus poeta dixit hoc carmen:

[9] 

1. Soerclanda h-Erenn uili
   romarbtha la h-enduine
   acht na tri maic monar n-gle
   atrullatar o Cairpre.
2. Feradach Find Fechtnach Fail
   Corb Ulom a Mumain mair
   Tipraite Tiarech tren tall
   at iat sin a comanmann.
3. Torrcha adrullatar sair
   a maithrecha na mac sin
   conid ann ruchta astir thair
   iar riachtain doib i n-Albain.
 p.112
4. Ingen riag Alban gan ail
   ba si maathair Feradaig
   Baine ba sed ainm na mna
   ingen Luaith mc Derera.
5. Gruibi ingen Gairtniat gluair
   rogab Breatna gusin m-buaid
   maathair Corb Uluim cen ail
   isa sil fil i Mumain.
6. Ingen riag Saxan nia snead
   maathair in Tipraite trein
   Aine ba he h-ainm oc a taig
   ingen comlan Caindi Oil.
7. Doronsat comairli chain
   Athaig h-Erenn in uair sin
   uair thallad forthu as gach mudh
   ith blicht mess ⁊ torud.
 p.113
8. Hi comairle ro chindset
   aithrech leo inni ro millset
   togairm na mac monar ngle
   dia n-oirdnedh i n-airdrighe.
9. Doratsat ratha co tend
   Aithechthuatha na h-Erenn
   im rer na mac batar tair
   acht cho tistais a h-Albain.
10. h-It h-e ratha tucsat ind
    nem talam esca grian grind
    immoa rer beinn a m-benn
    h-eret beth muir im Erinn.
11. Cond, Eogan, Airaide an
    h-it e cined na tri mal.
    Araide i n-Emain cen ail
    Conn Cetcathach i Temair.
 p.114
12. Eogan i Caisiul na righ
    is ann tarrustar a sil
    conid riu sin siu ⁊ tall
    samlus in sai gach soercland. Soerclanda.

[10]  Fodailset tuatha Aithech[d]a iarsain fo Erinn ⁊ rodet doergreim flatha Erenn uasaibh iarna fodail, ut est hic:
Gaileoin hi Cuigiud Lagen Tuath-Gabair ⁊ teora fodla foraib: Tuath Fidga ⁊ T. Fochmaind ⁊ Tuath Aithechda.
Tuatha Fochmuinn for Aibh Failgi ⁊ for Fotharthaib AIbreach ⁊ for Almuin ⁊ anas dir di i finibh.
Tuath Aithechdha batar for Airther Lifi co muir.
T. Fidga for Fortuathaib Laigen ⁊ for UIb Cennselaig.

[11]  T. Brecraigi for Laignib Des-Gabair .i. for Osraige.
T.Treithirni i Muig Breguin ⁊ i n-Eoganacht Chaisil et rl.
T. Semonn i nDesib Muman.
T. Cairaig i n-Huib Liathain ⁊ i n-Huib mc. Cailli.
T. Bibraigi i Corco Laighi.
T. mac nDerbchon i Feraib Muige.
T. Benntraigi i n-Huib Echach Muman.

[12]  T. Mairthene i Muscraigr Mittaini ⁊ Airt[h]ir Femin ⁊ Liacc Tuill ⁊ Tiri ⁊ Aeda ⁊ Bregain etrl. ⁊ i n-Huib Cairpri.
Sil Mogad mc. Miled i n-Iarmumain ⁊ Corco Duibni ⁊ i n-Eoganacht Lacha Lein ⁊ Raithlainn ⁊ Aine ⁊ Glennamnach etrl.
T. SenErann toisech i Ciarraigin Luachra ⁊ i Luachair Dedaid.
T. Morcc ⁊ T. Geibtine i n-Huib Conaill.
T. Eminrige i nHirmumain ⁊ isnaib Helib.
T. Mac n-Umoir i nDail Cais ⁊ i n-Huib Fiachrach Aidhni.
T. Hua Cathbsrr ⁊ Hua Carra hi Corco Muichi ⁊ Bascain ⁊ Duibne Morruad ⁊ Laigdhi in Eilib ⁊ Duichni la Muscraige ⁊ Oiche inUib Conaill.

[13]  T. Fer Ruidi fos i Corc Mo Dhruadh.
T. Fer Ninais i n-Eoganacht Rois Argait ⁊ innaran (sic) ⁊ i n-Arainn.
T. Cattraig i n-Huib Maine Descirt.
T. SenCenel i n-Huib Maine Tuaiscirt.
T. Concobuirni ⁊ Mac n-Umoir for Hui Briuin ⁊ im Loch Cine ⁊ hi Cluain Fuiche.
T. Resen for Conmaicnib o Ath Moga co fairgi.
T. Mac n-Umoir i n-Umall.
T. Fer nDomnann i Crich Cera ⁊ i n-Uib Amalgada ⁊ i n-Huib Fiachrach Tuaiscirt o Rodba (proprium amnis) co Congnaig (proprium amnis) hi Cairpriu Droma Cliab.

[14]  T. Cruithneach i Maig AEi ⁊ i Maig Luirg o Loch Ce co Brog Eil ⁊ co Sinaind.
T. Crecraige i lLuigni Connacht ⁊ im Loch Teched ⁊ um in Corann ⁊ im Bernus Tire Oiliolla co Mag Tuired.
T. Ochuine ⁊ T. guaire o Rus Gauill i Tir Oilella co Mag Cetne ⁊ co h-Es Ruaid.
T. Tarduis i Tir Eoa[gain] ⁊ i n-Huib Nell in Tuaiscirt.
T. Chruithnec[h] in Tuaiscirt otha Sidan Sleabe in Cairn co Loc Febail ocus ota Bernus Tire h-AEda co Banna.
T. Chruithnech hi tir Ulad ⁊ i Maig Coba.
T. Buaim ndimbuain ⁊ T. Selle i nDal Araide.

[15]  T. Nebliarg i n-Airgiallaib o Glinn Rige co Loch N-Erne ⁊ o Buaigh co Loch Febail.
T. Ligmuine hi nGailengaib.
T. Mac Treda i n-Iarrthur Mide ⁊ Fer Fer ⁊ hi Cuircne.
T. Masraige i Maig Slecht i n-Uib Briuin Brefni.
T. Airbri i Tebtha.
T. Glasraige im Cairpre ⁊ im Loch Silenn.
T. Conraig i Sleaib Breg ⁊ i Mughornaib ⁊ i n-Uib Segain ⁊ i Feraib Rois ⁊ i Arda ⁊ i Feraib Luirg ⁊ isna da Cremhthainne.

[16]  T. Luaigne imBregaib ⁊ lLaeghaire ⁊ i n-Ardgul ⁊ isin da Delbna ⁊ i n-U Maic Huais ⁊ co Temuir o Inbuir Colbhta co comar Cluana h-Iraird.
Conid amlaid sin ro foglaid.

Finit.

@book{G105012,
  title 	 = {Genealogical tracts I},
  editor 	 = {Toirdhealbhach Ó Raithbheartaigh},
  edition 	 = {1},
  note 	 = {1 volume; viii + 245: Introduction to Dubhaltach Mac Firbhisigh's Genealogies (preface 1–32; introduction proper 33–106); tracts on the tributary peoples from BB, the Book of Lecan, TCD 1336 (H. 3. 17), RIA 1134 olim 23 E 29 (Book of Fermoy) and MS Laud 610 (107–132); miscellaneous excerpts from the Book of Lecan and one from Rawlinson 502 (133–end).},
  publisher 	 = {Stationery Office},
  address 	 = { Dublin},
  date 	 = {1932}
}
 G105012.bib