unknown

Edited by Kuno Meyer

The Vision of Laisrén

Rawlinson B. 512, 44ra–44vb.

1.

 44raFeachtas luid Laisren for slatrad o muintir Cluana do glanad Chluana Cain, cell file a crich Connacht. Ro áin tri tredna la glanad na cille. I forciunn an tres tredain doforthrom cotlud fair isin derrthach, cu cuala trena cotlud in guth fris: “At-rai-su as!”. Nin gluais an cetna fecht. Co cuala aitherrach in guth. To-ocaib a cenn la sodain acus do-beir airde na croichi dara gnuis. Co n-aca ba solas ind eclais i m-bai, acus bai drechd din aidchi beos. Acus co n-aca in deilb n-etroicht etir an crocaingel acus an altoir.

2.

As-bert an delb fris: “Tair am dochum!”. Crithnaigistar a corp uili an clerigh o mullach co fonn lasin n-guth n-í sin. Co n-acai anmain opunn co m-bui for a mullach acus ni fitir cia conair do-choid asin churp. Co n-acai ba obeola ind eclais suas dochum nime, co n-acai nan-gabsat da aingel eturru acus con-uacbasat isin aér.

3.

Co n-aca iarum arbar de ainglib ara chiunn. Acus co n-accatar arbar aile do demnaib acus finna (?) tenntide impueib, acus tene as gech ball ro bui inntibh. Teora dealba do-arfás do forsna h-ib demnaib. Dealb rodub for alaile dib, acus gai boilggi tentidi ina lámaib, acus dealb ciardub for alaile, acus saigde tentide ina lamaib. Dealb mothluch forsin tres lucht, acus find tentidi trethu amail finn n-omthainn, acus goith tentide ina l-lamaib.

4.

Do-génsat na  44rb tri lina-su tra aonergail catha dib do chosnam na h-anma frisna h-aingliu. Et do-accair oenfer dib frisin anmain for oentacra fot a anála cen coemchlod n-innsce a n-do-ringena do mignimaib o génair. Aidblidir lasin anmain a n-oentacrai sin a m-bith biet, acus nico n-erbart acht fir acus nocha targart fuirri gach ni do-rad a coibsena do anmcarait r n-dul a curp.

5.

Fris-gart aingel don arbar mór dar cheann na h-anma don deman acus as-bert: “Tairgairt tra do tacra n-uili”. Fris-gart an demon acus as ed as-bert: “Ni targart, ni targart anas moam de.” Fris-gart aingel: “Nin-cumca-sa a tacra n-i sin, o do-rata a coibsena acus a peinne do reir anmcharat re tuidencht a curp. Ércid tra”, ol an t-aingel, “ni fuil cuid duib isin fir-sa”. “Mad fír briathar Dé”, ol in daemon, “ni sceram an cruth-sa, ar ni derna an fer-sa núidin dé amail don-imarngair Dia dó, dicens”: ‘nisi conuersi fueritis et efficiamini sicut paruuli, non inntrabitis in regnum celorum.’ (Matth. 18:3.) “Is fir tra briathar Dé,” ol an t-aingel, “ar ni do {⬌} anad do-dechaid an fer-sa co demnaib, ar beraid robad reunn coa cheli. Ascaigid uan tra,” ol an t-aingel. Fo-scuichsetar uada fo cetoir.

6.

As-bert iarum aingel don arbar mor frisin da aingel batar imme: “Beirid tra an fer-sa co n-aicedar ifern.” Legar iarum fo tuaith fo glenn mar. Sírithir leis co n-acadar amail bid o turcbail greine co fuined. Co n-acadar fochlui mar amail bid beolu uama etir da sliab, co ristais iar n-uachtar. Tiagait isin uaim cein mair, co r-rancatar sliab  44va mar n-ard n-dub ara ciund for belaib an ifirn acus gleann mar i n-ochtur an t-slebi-sin. Edh indus an glenda-sin: lethan iar n-ichtur, coel iar n-uachtar. Is ed indsin dono dorus an ifirn acus a erportach ind uaim.

7.

Acus co n-acai lucht inna innsea a fail dib i n-etail De a corp. Ro batar a medon an glenna acus eat oc cui. “Olc, a Dé!”, ol an anim. “In duineba thanaic diar n-eis? ol at-bebatar an t-sluaig-si uili diar n-éis an tan forsa-ragabsam”. “Ni ed”, ol an t-aingel, “acht cech oen fail i n-étail Dé a m-bethaid dit éis, iss ed indso for-accat a n-anmain, acus as airchenn ard atá, mani dernat aithrige.” “Cest: in eber-sa”, ol in fer, “fri cech n-anmain at-cíu sund?” “Nato”, ol an t-aingel, “arnabat derchaintech de. Apair friu immorro denat aithrige, ar nach aon do-gena aithrighe acus forcennfa inti, ni bia isind luc-sa, acht biaid i l-luc dídanta ond ulc-sa, acus nam-bera a aithrige secha. Acus dano an t-i bias i firinde, as betha for-accai cein bis i curp acus as betha 'na m-bia, mad feidil i firinne. Apair friu iarum,” ol in t-aingel, “an t-i fuil i firinne bád feidil innti, ar ni ba sir a n-imráiti con na tí ec. p.116 In t-i dano fil i n-etail Dé, dénad aithrige, ol ar-foem Dia ind aithrige, mad o cride etail do-gnether acus cun-genaid trocaire De fris.”

8.

Do-lluid iarsin anam ind fir i nd-ifirn fadeisin .i. muir tened co n-anfad di-aisneise acus cona thonnaib di-aisneisi fair. Acus at-connairc na h-anmann isin muir-sin for lasad a cenna uasa uili, it e oc gol acus oc mairg cen cumsanad tria bithu.  44vb Araile dona h-anmaib acus clói teinntidhe tria tengtha fria cend anechtair, araile dib tria cluasa, araile dib tré suile.

9.

At-connairc dano araile dib acus a m-beoil obéla acus na demna oc a tairbert co n-gablaib teinntidib fo chosmailius na tri lín n-aile. Accobair an fer co fessed decoir na pian. Fris-rogart an t-aingel fo cetoir ar cuma no frisgaired an t-aingel do menmannaib acus imraitib: “In lucht at-chiu-siu tra cusna cluib teintidib triana tengthaib .i. aes annsin naruo menic oc molad Dé nó oc a bennachad acus a adrad, acus rop menci immorro oc goi acus oc gol acus ac br{⬌} acus ethech acus ecnach acus rad uabair acus” {⬌} ⁴

@book{G207003,
  UNKNOWN 	 = {title},
  editor 	 = {Kuno Meyer},
  edition 	 = {0},
  note 	 = {,
  UNKNOWN 	 = {measure}},
  publisher 	 = {David Nutt},
  address 	 = {London},
  date 	 = {1899}
}
 G207003.bib