unknown

Edited by Kuno Meyer

 p.172

Colum Cille cecinit: Aus Laud 615, S. 7.

1. Fersaighecht an tempuil tall
   go mīn is go mall gan lūas,
   innis-siu sin is nā ceil
   is inmhain sin ar nimh thúas.
2. Mairbh an domuin go nguth ngnāth
   ó sin amach go bráth mbūan,
   fersaighecht lúath is leō is locht,
   dobeir sin sprocht ar an sūan.
3. Ge lūath guth gadhair gloin glē
   og tafann fīadha ar bith cé,
   is lūaithe an urnaigthe sund
   ag tabairt anma a hiffurn.
4. Gerb imdha ēighemh isan cath
   isin mhaidin ar Muigh Rath,
   lia ēighemh a n-ifern fá nāi
   ga argain don urnaichthi.
5. Sīrghabāil na salm 'masech
   ocus bīaide na clēirech,
   re demhan is mór a fúath
   ge mall gabar īat go lūath.
6. Itaid ráidh
   terc dona cléirchib is cáidh,
   amail muilend bīs 'na rith
   nī dhēnann don ith acht cáith.
7. An tenga ag gabáil na salm
   in t-aignedh 'sa t-olc agarbh,
   is hī an chaindel gan tumadh
   nach gabhann re fursunnad.
8. Mairg fer ngrāidh
   dā nach tabair in dā lāimh,
   in lāmh timsaighess an crodh,
   's a lāmh eile 'ga scāiledh.
9. Mairg fer ngrāid risnach ceisd
   an deoch ibhess don linn mheisg,
   in deoch sin ge milis leis,
   is hī desgaidh an dīmais.
 p.173
10. Mairg fer ngrāidh cuires fa choim
    in lāimh dá linann a bhroind,
    dī muna bīatha bochta
    bidh pían dó, bidh bithgorta.
11. Bidh olc bīas a n-ēire sunn
    antan raghus don aifriunn,
    an sagart santach selbach
    celgach fergach mōrmenmnach.
12. Dá mbīa ag fursannadh caindel
    's ag lūagh lēighind co hanghuidh,
    ga múchadh gu coimsi cain
    ag būain tsoillsi don anmain.
13. Maircc dána bēs bithagra,
    maircc nāch rīaraigh a līatha,
    nī maith borb ré cairechadh,
    beridh sleamuin a fīacha.
14. ēirgidh in fīachach fāthach
    go gnāthach is go glētheach,
    dā síre tír n-ard nērenn
    nocha n-ēirghinn in t-ētheach.
15. Is mē Colum Cille ō Nēill,
    dūthrigim cobair d'ēirinn,
    gach olc thiucfas rena slūagh
    nocha lim-sa nách lāntrūagh.
16. Mé Colum Cille na clog
    's am aontadhach re heaspoc,
    nī gnāth dam suidhe re slūagh
    nogo rab duine rothrūagh.
17. Mē Colum Cille gu becht
    mac Feidlimidh na naoimhfhert,
    nīr lág re sechtmuin am corp
    ni nosāsadh bocht aoinfhecht.
18. Nem abus ocus nem tall
    in Coimdi cia da tabrann,
    as é as nemdaidh uile
    dā nem d'faghbāil d'ēnduine.
19. Madh hē in doman thall chara,
    bí a péin abus gēin mara,
    madh bus let as gaire
    dochum nime nī ragha.
20. Gach sen, gach sagart salmach,
    is de bus tarbach a tress,
    acht manbad toiscce doghēbadh
    anadh do léghadh na bfers. F.
21. Mē Colum Cille gan feall,
    romchar Rī na rend gan chess,
    gairit lem gacha dardaoin
    beth ag mo Rīgh ac rīm ferss. F.
22. Cethri ar fhichit co fír
    ar bēlaib mo Rígh rofeas,
    bindi leam ceól áoinfhir dībh
    iná a fhuil in bar tīr ag rīm fers. F.
23. A Bāithīn mhóir bághaigh bháin,
    aithin dáibh dénad a les,
    mar doníad cuirp do níamhadh
    dénad don Rígh ríaghladh fers. F.
24. Do chabrus Fīnnachta fīal
    do bí thīar a lén rofess,
    d'fhágus hē a Temraig na rígh,
    maith mo ghnīmh ac rím na fers F.
 p.174
25. Do chabrus Cairbre gan scís
    ón lon chráes do bí 'na chnes,
    ōn ló dofhūarus a fhis
    dofhōires lé criss mo les,
    iss edh fodera sin go fiadhnach,
    m'fheabus don Rígh ag rīagladh fhers. Fersoidhecht.
26. Geinfidh Adhamnán 'na cill,
    bid cléirech glan grind rofes,
    saorfaid banchuire fhear Fáil
    ac rér a mhāthar 's gá les,
    is bīaidh ga himchur gan dīamair
    re secht mblīadnuib, mar do feas,
    nogu toir ōn Rígh 'na dhāil
    na mná do shaoradh gan ces,
    bīaidh sé 'na abaidh co fír
    a ní ag rímh 's ag ríaghladh fers. Fersoidhecht.
27. Nindidh Lāimhedón dar leam
    ag réir Brighde gan fheall tres,
    is é doní a comna a nDún,
    maith a rún ag rīaghladh fers. F.
28. Cainnech is Comgall, dīas fhīal,
    soir síar 'gam ríar mur rofes,
    a guide an Ardrīgh go cīamair
    ga pīanud ag rīaglad fers. F.
29. Clanna dīre a n-agaid Pādraig
    lāidir in duine re tres,
    domarb Pādraig clanna díre,
    fūair ōn Rīgh ag rīagladh fers. F.
30. Ní fregēra talam tūar
    tiugfa ūair bid trūag in treas,
    m'aigned-sa go hecht ga thúr,
    bid terc crann ūr ⁊ meas,
    nocha bía saltair ga lēgadh
    a carcair nō ag rīaglad fers. F.
31. Racha a mblicht ōna būaib,
    nocha bīaidh ith thúaidh nā thes.
    nī gēbtar sailm a ndamlīag,
    acht sgairb is brēg ar son fers. F.
32. Gan sechtbairgen rēill re cobair,
    gan foghail dōib féin rofes,
    āenta shoisgēla go fír
    recha ūathaib gan gnīm fhers,
    nocha bía cādhus farír!
    a n-ārus na naomh do fes. F.
33. Sáiréochuid Goill ⁊ Gaoidhil
    nī bía gnīm éinfhir ré leas,
    teithfidh gach cuire fon coill
    gan fuireach a cill re tress,
    nocho bía eaccnaidh mo núar
    a n-ecclais acc lūagh na fers. F.
34. Budh troma easboc ar cill
    ná gach rí re lind rofeass,
    tiucfaidh na ndāil saoth is imnedh,
    trāethfuidh īascc inbher is ess,
    ní airémhad naomh ná feathal,
    budh sāebh a treathan ré tres, p.175
    ní cretfid Athair na ndūl
    acc tochailt mhúr ⁊ less,
    trūagh lium a mbladhmand budhchēin
    a n-anmanda a pēin rofeass,
    budh beacc a foghnamh don Rígh,
    budh terc don díne acc rīmh fers. ¹

Fearsoidecht.

@article{G208004,
  editor 	 = {Kuno Meyer},
  title 	 = {Colum Cille cecinit (Aus Laud 615, S.7)},
  journal 	 = {Zeitschrift für Celtische Philologie},
  number 	 = {9},
  address 	 = {Halle/Saale},
  publisher 	 = {Max Niemeyer},
  date 	 = {1913},
  pages 	 = {173–175}
}
 G208004.bib