unknown

Edited by J. G. O'Keeffe

Cormac mac Cuillenáin and the jesters ¹

1.

 ² Tri briathra do-ratt Coprmac mac Cuildenain.i. nach biad en-aghaid re a lind gan tri neithe do denam .i. cen ní do tiodhnacadh ⁊ cen ilceola anaitenta d' eistecht ⁊ gan iarmeirge dutrachtach do denam i n-onóir in aird-righ.

2.

Et in aghaid re c-cath do tabairt dó do Cerball mac Muiregain do-battar triar crossan fa mór airmittin ⁊ gratsa aicce ina focair in aghaid-sin. Et do-rat duine tri h-ubla mora aidble do Corpmac et adubairt; “A crossana,” ar se, “da n-derntai airfitedh amarach dam, do-gebhtai na h-ubla sech in slogh uile,” ⁊ do-gabattar do laimh co n-dingnedis ge mad beo marbh iat. “Tabraidh mo lamh fa comhall-sin,” ar Corbmac, ⁊ do-naiscc orra amlaid-sin, ⁊ tuccadh in cath  p.9 arna marach ⁊ do-rochair Cormac ann. Et ar t-techt na h-aidhce da n-ionnsaighe adubairt Cerball: “Eirgidh nech uaibh,” ar se, “d' fis an armaigh ⁊ do fechain Corbmaic an comhaillfed-se a luighe.” ⁊ do-cuaidh in techtaire dia fis ⁊ mar do-bí ann at-connairc cinnu na c-crosan ic com-aentuccud cum a cele.

3.

Is ann adubairt Gegan, an brathair ba h-amhra ⁊ ba h-aireghda dibh: “Druididh cuccainn ille,” ar se, “et an f-fedabair cuin do-gabhabair do laimh airfittedh do denam do mac Cuilennain et as mor an feidhm a dingbáil airfidigh do denam dó, ⁊ dá madh beo sinde, do-génmais a airpeitedh ⁊ do-cedaigh in Coimdhe dún a airfidedh-somh et sind marbh.” Et at-bert Gegan na roinn-si:

1. Truaghan sin, a Rí na righ,
   a Rí firen fichtib sluaigh,
   is eolcaire na gach ceol
   ceol na c-cend in aidche ̇fuair.
2. A chind Gégain, druid ille,
   co n-dernamais coinircle,
   mór inní fa t-tuccsam láimh
   airfeitedh mic Cuilendain.
3. Ar t-triur brathar dúin aréir
   maith ar lathar imon sluagh,
   anocht ge 'táit ar tri cind
   acc airfittedh co tim truagh.
4. Uch monuar on uch monuar,
   ge gerr ó dhomnach go luan
   as giorra bíos rí na nell
   ag denam trein go m-ba truagh.
5. Do-rat uball cech fir dún
   flaith do-bí ag fulang na sluagh,
   agus do-naiscc oirn da deoin
   co n-dingnemis ceol bud truagh.
 p.10
6. O do-tuit Pol le Neir—
   sgel mor isa domhan toir—
   nochar faccbadh ar in n-glend
   indsamhail chinn Corbmaic cain.
7. Uchan, ach,
   do-tuit Cormac isin cath,
   o thesta a sil asin m-bith,
   maisi righ Caisil at-bath.
8. Corbmac a Tulach na righ
   do-badh rí ar Mumain muadh
   gach ni do-fuighill a bel,
   do-fuiling gach tren is grach truagh.
9. Maith do suidhe dabach mór,
   maith do dluighe ralach ruadh,
   maith do tabairt laich i l-lén,
   maith do denamh trén do truagh.
10. Camhair-so, coisccidh bhar c-ceol,
    mithid dibh eistecht monuar,
    beiridh bennachtain anocht
    is eirgidh chum bhar c-corp truagh.

@incollection{G302017,
  editor 	 = {J. G. O'Keeffe},
  title 	 = {Cormac mac Cuillenáin and the jesters},
  booktitle 	 = {Irish Texts},
  volume 	 = {3},
  address 	 = {London},
  publisher 	 = {Sheed and Ward},
  date 	 = {1931},
  pages 	 = {8–10}
}
 G302017.bib