unknown

Edited by Francis Shaw

The dream of Óengus

Aislinge Óenguso inso

1.

Boí Óengus in n-aidchi n-aili inna chotlud. Co n-accae ní, in n-ingin cucci for crunn síuil dó. Is sí as áilldem ro boí i n-Ére. Luid Óengus do gabáil a l-lámae dia tabairt cucci inna imdai. Co n-accae ní; fo-sceinn úad opunn. Nícon ̇fitir cia árluid h-úad. Boí and co arabárach. Nípo slán laiss a menmae. Do-génai galar n-dó in delb ad-condairc cen a h-accaldaim. Nícon luid biad inna béolu. Boí and do aidchi dano aithirriuch. Co  p.44n-accae timpán inna láim as bindem boíe. Sennid céol n- dó. Con-tuil friss. Bíid and co arabárach. Nícon ro-proindig dano arabárach.

2.

Blíadain lán dó os sí occa aithigid fon séol sin condid corastar i sergg. Nícon  p.45 epert fri nech. F-a-ceird i sergg íarum ocus ní fitir nech cid ro m-boí. Do-ecmalldar legi Érenn. Nícon ̇fetatar-som cid ro m-boí asendud. Ethae co Fíngen, liaig Conchobuir. Do-tét-side cucci. Ad-gninad-som i n-aigid in duini a n-galar no bíth for ocus ad-gninad din dieid no théiged din tig a l-lín no bíth co n-galar and.

3.

Atn-gládastar for leith. p.46“Ate! nítat béodai do imthechta”, ol Fíngen, “Sercc écmaise ro carais”. “Ad-rumadar mo galar form”, ol Óengus. p.47 “Do-rochar i n-dochraidi ocus ní rolámar a epirt fri nech”, ol Fíngen. “Is fír deit”, ol Óengus. “Do-m-ánaic ingen álaind in chrotha as áilldem i n-Ére co n-écusc derscaigthiu. Timpán inna l-láim, conid senned dam cach n-aidchi.” “Ní báe”, ol Fíngen; “do-rogad duit cairdes frie; ocus foítter úait cossin m-Boinn, cot máthair, co tuidich dot accaldaim”.

4.

Tíagair cuicce. Tic iarum in Boann. “Bíu oc frepaid ind ̇fir-se”, ol Fíngen, “d-an-ánaic galar n-ainchis”. Ad-fíadot a scéla don Boinn. p.48“Bíd a ̇freccor céill dia máthair”, ol Fíngen. “D-an-ánaic galar n-ainchis; ocus timchelltar h-úait Ériu uile, dús in n-étar h-úait ingen in chrotha so ad-condairc do macc”. Bíid oc suidiu co cenn m-blíadnae. Nícon ̇frith ní ba chosmail di. Is iar sin con-gairther Fíngen doib aithirriuch. “Nícon ̇frith cobair isindísiu”, ol Boann. As-bert Fíngen: “Foítter cossin n-Dagdae tuidecht do accaldaim a maicc”.

5.

Tíagair cossin n-Dagdae. Ticc-side aithirriuch. p.49 “Cid diandom-chomgrad?” “Do airli do maicc”, ol in Boann. “Is ferr duit a chobair. Is liach a dul immudu. At-tá i siurgg. Ro car seircc écmaise ocus ní roachar a chobair”. “Cia torbae mo accaldam?” ol in Dagdae. “Ní móo mo éolas in- dáthe-si”. p.50 “Móo écin”, ol Fíngen. “Is tú rí síde n-Érenn; ocus tíagar úaib co Bodb, ríg síde Muman, ocus is deilm a éolas la h-Érinn n-uili”.

6.

Ethae co suide. Feraid-side fáilti friu. “Fo chen dúib”, ol Bodb, “a muinter in Dagdai”. “Is ed do-roachtmar”. “Scéla lib?” ol Bodb. “Atáat linni: Óengus macc in Dagdai i siurgg dá blíadnae”. “Cid táas?” ol Bodb. “Ad-condairc ingin inna chotlud. Nícon ̇fetammar i n-Ére cia h-airm i tá ind ingen ro char ocus ad-condairc. Timmarnad  p.51 duit ón Dagdae co comtastar h-úait fond Érinn ingen in chrotha-sa ocus ind écuisc”. “Con- díastar” ol Bodb, “ocus étar dál blíadnae friumm co fessur fis scél”.

7.

Do-lluid cinn blíadnae co tech m-Buidb co Síd Ar Femen. “To-imchiullus Érinn n-uili co fuar  p.52 in n-ingen oc Loch Bél Dracon oc Crottaib Cliach”, ol Bodb. Tíagair úaidib dochum in Dagdai. Ferthair fáilte friu. “Scéla lib?” ol in Dagdae. “Scéla maithi; fo-fríth ind ingen in chrotha-so as-rubartaid.” Timmarnad duit ó Bodb. Táet ass Óengus linni a dochum dús in n-aithgne in n-ingin, conda accathar. Brethae Óengus i carput co m-boí oc Síd Al Femen. Fled mór lassin ríg ara ciunn. Ferthae fáilte friss. Bátar trí láa ocus teora aidchi ocond ̇fleid. “Tair ass trá”, ol Bodb, “dús in n-aithgne in n-ingin conda aiccther”.  p.53 “Ci ad-da-gnoe, ní-s cumcaim-si a tabairt acht ad-n-da-cether namá.”

8.

To-lotar íarum co m-bátar oc Loch. Co n-accatar inna tri cóecta ingen macdacht. Co n-accatar in n-ingin n-etarru. Ní tacmuictis inna h-ingena dí acht  p.54 coticci a gualainn. Slabrad airgdide eter cach dí ingin. Muince airgdide imma brágait fadisin ocus slabrad di ór ̇forloiscthiu. Is and as-bert Bodb: “In n-aithgén in n-ingen n-ucut?” “Aithgén écin”, ol Óengus. “Ní-m thá-sa cumacc deit”, ol Bodb, “bas móo”. “Ní báe són”, ol Óengus, “ém; óre as sí ad-condarc; ní cumcub a breith in fecht-so.” “Cuich ind ingen-sa, a Buidb?” ol Óengus. p.55 “Ro-fetar écin”, ol in Bodb, “Caer Ibormeith, ingen Ethail Anbuail a s-Síd Úamain i crích Connacht”.

9.

Do-comlat ass íarum Óengus ocus a muinter dochum a críche. Téit Bodb laiss co n-árlastar in n-Dagdae ocus in m-Boinn oc Bruig Maicc ind Óicc. Ad-fíadat a scéla doib ad-fídatar doib amail m-boíe p.56eter cruth ocus écoscc amail ad-condarcatar. Ocus ad-fídatar a h-ainm ocus ainm a h-athar ocus a senathar. “Ní ségdae dúnn”, ol in Dagdae, “ná cumcem do socht”. “Aní bad maith duit, a Dagdai”, ol Bodb. “Eircc dochum n-Ailella ocus Medbae ar is leo bíid inna cóiciud ind ingen”.

10.

Téit in Dagdae co m-boí i tírib Connacht, trí fichit carpat a lín. Ferthae fáilte friu lassin ríg ocus in rígnai. Bátar sechtmain láin oc fledugud íar sin im chormann doib. “Cid immu-b-rácht?” ol in rí. p.57 “At-tá ingen lat-su it ̇ferunn”, ol in Dagdae, “ocus ro-s car mo macc-sa, ocus do-rónad galar dó. Do-dechad-sa cuccuib dús in-da-tartaid don macc”. “Cuich?” ol Ailill. “Ingen Ethail Anbuail”. “Ní linni a cumacc”, ol Ailill ocus Medb. “Dia cuimsimmis do-bérthae dó”. p.58 “Ani for-maith -congairther rí in t-síde cuccuib”, ol in Dagdae.

11.

Téit rechtaire Ailella cucci. “Timmarnad duit ó Ailill ocus Meidb dul dia n-accaldaim”. “Ní reg-sa”, ol sé. “Ní tibér mo ingin do macc in Dagdai”. Fásagar co h-Ailill anísin. “Ní étar fair a thuidecht; ro-fitir aní dia con-garar”. “Ní báe”, ol Ailill, “do-rega-som ocus do-bértar cenna a laech laiss”. Íar sin cot-éirig teglach n-Ailella ocus muinter in Dagdai dochum in t-síde. Inrethat a síd n-uile. Do-sm-berat trí p.59fichtea cenn ass ocus in ríg co m-boí i Crúachnaib i n-ergabáil.

12.

Is íarum as-bert Ailill fri h-Ethal n-Anbuail: “tabair do ingin do macc in Dagdai”. “Ni cumcaim”, ol sé. “Is móo a cumachtae in- dó”. “Ced cumachtae mór fil lee?” ol Ailill. “Ní anse; bíid i n-deilb éuin cach la blíadnai, in m-blíadnai n-aili i n-deilb duini”. “Ci-ssí blíadain m-bís i n-deilb éuin?” ol Ailill. “Ní lemm-sa a mrath”, ol a h-athair. “Do chenn dít”, ol Ailill, “mani-n-écis-ni”. p.60 “Níba sia cucci dam-sa”, ol sé. “At-bérsa”, ol sé; is lérithir sin ro-n gabsaid occai. “In t-samuin-se as nessam bieid i n-deilb éuin oc Loch Bél Dracon, ocus ad-cichsiter sain-éuin lee and, ocus bieit p.61trí cóecait géise n-impe; ocus at-tá aurgnam lemm-sa doib”. “Ni báe lemm-sa iarum,” ol in Dagdae, “óre ro-fetar a h-aicned do-s-uc-so”.

13.

Do-gníther íarum cairdes leu .i. Ailill ocus Ethal ocus in Dagdae ocus soírthair Ethal ass. Celebraid in Dagdae doib. Ticc in Dagdae dia thig ocus ad-fét a scéla dia macc. “Eirc immon samuin as nessam co p.62 Loch Bél Dracon con-da-garae cuccut dind loch”. Téit in Macc Óc co m-boí oc Loch Bél Dracon. Co n-accae trí cóecta én find forsind loch cona slabradaib airgdidib co caírchesaib órdaib imma cenna. Boí Óengus i n-deilb doínachta for brú ind locha. Con-gair in n-ingin cucci. “Tair dom accaldaim, a Chaer”. “Cia do-m-gair?” ol Caer. “Cotot-gair Óengus”. “Regait diandom fhoíme ar th' inchaib p.63co tís a l-loch mofhrithisi.” “Fo-t-sisiur”, ol sé.

14.

Téiti cucci. Fo-ceird-sium dí láim forrae. Con-tuilet i n-deilb dá géise co timchellsat a l-loch fo thrí conná bed ní bad meth n-enech dó-som. To-comlat ass i n-deilb dá én ̇find co m-batar ocin Bruig Maicc in Óicc, ocus chechnatar cocetal cíuil co corastar inna dóini i súan trí láa ocus teora n-aidche. Anais laiss ind ingen íar sin.

15.

Is de sin ro boí cairdes in Maicc Óic ocus Ailella ocus Medbae. Is de sin do-cuaid Óengus, tricha cét, co Ailill ocus Meidb do tháin inna m-bó a Cúailnge.

@book{G300001,
  title 	 = {Aislinge Óenguso},
  origtitle 	 = {The dream of Óengus},
  editor 	 = {Francis Shaw},
  edition 	 = {1},
  pages 	 = {119pp},
  publisher 	 = {Brown \& Nolan Limited},
  address 	 = {Dublin},
  date 	 = {1934}
}
 G300001.bib